MIANI og managlahing reaksiyon sa publiko ang hungihong nga sirhan ang tanang sementeryo sa nasud karong umaabot nga Kalag-Kalag.
Giingon nga himuon kini nga maoy usa ka pamaagi sa paglikay sa pagtapok sa tawo aron malikayan ang local transmission sa coronavirus disease (Covid-19).
Sumala ni Rhodora Florante, 54 anyos nga taga Exodus, Barangay 8-A, Poblacion, Davao City, nga dili siya uyon kung mahitabo kini.
"Sa akoa lang, di ko mouyon anang sirhan nila, ngano man diay og ipatuman gyod ang istriktong mga health protocols, dili na unta ta higtan pag-ayo sa gobyerno, husto ning atong gihimo karon nga hinay-hinay gyod tang gibuhian, aron makakaon ta," ingon ni Rhodora sa Superbalita Davao.
Samtang si Mario Gildore, 46 anyos, usa ka traysikol drayber sa Father Selga Street, Barangay 8-A, nagbutyag nga dili sab siya uyon nga sirhan.
“Imbes makadako-dako ta'g kita anang adlawa, di na hinuon kay wa namay manakay, naunsa man ning gobyerno oi, kung ang ilang tan-aw kaluwasan sa mga tawo, unya kung wa nay gikaon ang tawo unsaon naman na?” opinyon ni Gildore.
Mouyon na lang sab ug wala nay mabuhat kung hukom sa gobyerno ang usa ka flower vendor sa Bankerohan Public Market nga si alyas Marimar.
"Di gyud unta maayo nga sirhan, kusog unta kaayo ang bulak basta kana nga okasyon, pero kung pagbuot sa gobyerno unsa pa may mabuhat nato, mouyon na lang ta," ingon ni alyas Inday, kinsa nagpatago sa iyang tinuod nga pangalan.
Maayo sab nga sirhan aron luwas ang katawhan, kini ang opinyon sa usa ka lumolupyo sa Barangay 5-A, Bankerohan, alang niya mapundo sa balay ug mag-ampo na lang sa mga kalag sa mitaliwan.
"Sa balay na lang sa mag-ampo, dili bitaw ni hangtud sa hangtud ang Covid, karon lang man ni, ikaduha pod patay na na sila, puwede bisan asa nga handumon, sa ubang panahon, puwede moadto sa menteryo," sulti ni Flora Postrano, 55 anyos.
Sirhan ug dili ang menteryo ang importante mamahimong responsabli sa mga angay'ng himuon diha sa pagpasunod sa gobyerno sa mga health protocols.