MIDUSO og ordinansahon si Konsehal Rico Amores sa dakbayan sa Lapu-Lapu sa pagsilot sa magpataka og labay sa ginamit nga mga mask.
Kini subay sa nabantayang nagkatag nga mga ginamit nga mask sa mga pampublikong lugar.
Matod ni Amores, ang mask o ba kaha bisag unsang klase sa personal protective equipment (PPE) matumbok nga hazardous kun delikado sa publiko.
Kini gumikan kay posible aduna kini mga virus ug uban pang kagaw hinungdan nga angayang mapalayo sa katawhan.
Gisugyot usab ni Amores sa mga Oponganon nga kung mahimo mogamit og recyclable nga mask o katong mahimong malabhan aron dili magkaproblema sa disposal.
Ubos sa ordinansa ang usa ka household o paninalay giawhag sa paglahi sa ilang mga ginamit nga mask sa ordinaryong basura.
I-disinfect kini unya isirado ang gisudlan unya idisinfect na usab aron masigurong namatay ang mga kagaw niini samtang maghuwat nga kolektahon sa mga tigkolekta ug basura sa dakbayan.
Mas maayong butangan usab kini ug pahibawo nga “Covid waste” aron dali nga maila sa mga tigkolekta sa basura.
Kinahanglan usab nga kausa sa usa ka semana kolektahon kini sa tigkolekta ug basura aron masiguro nga dili kaayo kini dugay nga ma exposed sa katawhan.
P1,000 ang multa sa masakpang makalapas sa maong ordinasa sa first offenses. P3,000 sa second offense ug P5,000 sa third ug mosunod nga mga offense o ba kaha pagkabilanggo ug usa ngadto sa unom ka buwan depende sa mando sa korte.
Kun ugaling walay ikabayad adunay hangyonng gitagana ang kagamhanan sa first time offender nga P500 o ba kaha mopaubos sa community service ubos sa Department of Natural Resources DENR.
“Ang purpose ra gyud ani nga mapugngan amg pataka ug labay kay karon ato makita bisag asa na lang ang facemask unya delikado sa mga tawo kay naa unya nay virus,” matod ni Amores sa Superbalita Cebu. / GCM