GIKLARO ni Gobernador Gwendolyn Garcia nga ang cease and desist order nga iyang giisyu di ang pagpahunong sa tibuok operasyon sa kompaniya nga nagdumala sa pagkubkob og dolomite sa lungsod sa Alcoy.
Gipasabot ni Garcia nga ang kamandoan alang sa pagpahunong sa pag issue og ore transport permits sa nahabilin nga tulo ka mga shipment sa dolomite sa Alcoy.
Sa wa pa ang kontrobersiyal nga pagtambak og white sand sa Manila Bay, giingong naka-ship na sa makaduha ka mga higayon ang Dolomite Mining Corp. (DMC) ug Philippine Mining Service Corp. (PMSC) nga moabot sa 7,000 wet metric tons.
Wa nalakip sa kamandoan mao ang operasyon ubos sa Mineral Production Sharing Agreement (MPSA) sa Mines and GeoSciences Bureau (MGB).
Matod ni Garcia nga ubos sa kasabotan, gitugot ang pag-operate ug pag extract og dolomite sulod sa 25 ka tuig alang sa exports.
Sagad sa kustomer ang mga nasud sama sa Japan ug Korea kay gamit kini nga isagol sa paghimo og bildo ug puthaw.
Apan sukwahi ang nahitabo, sa 2019 nasuta nga nagkubkob na hinuon og dolomite ang DMC nga maoy gibaligya sa PMSC isip substitute sa balas ug graba ngadto sa mga local customer.
Nalakip na ang pag supply og dinugmok nga dolomite nga giabuno sa kontrobersiyal nga rehabilitation sa Manila Bay.
Sigon sa gobernador nga ubos sa MPSA, way permit ang naasoy nga kompaniya sa pagpamaligya sa lokal. Sa 2019, nagpada na og notisya ang Kapitolyo pinaagi sa Provincial Treasurers Office direkta sa PMSC sa pagkuha og waste disposal permit. Apan napakayas lang kini.
Dugang niya nga sanglit nagbaligya na og balas ug graba ang mga kompaniya sa lokal nga merkado pinaagi sa dinugmok nga dolomite, gikinahanglan kini nga mokuha og waste disposal permit sa kagamhanan sa probinsya sa Sugbo,
diin kinahanglan nga mag-remit na kini sa 10 porsyento nga bahinon sa barangay, sa LGU ug Kagamhanan sa Lalawigan.
“I am putting PMSC to task continuing to refuse to pay the province sa ilang pagpadayon sa pagdumili paghatag sa mga Sugboanon sa angay lamang nga madawat sa mga sugboanon sa usa ka mineral deposit nga ania sa Sugbo kon diin milyon milyon ang ilang kita. They cannot continue to operate with impunity without doing what is right,” matod ni Garcia.
Gawas sa maong kakuwangon, nabalaka si Garcia sa epekto sa sobra nga pagkubkob sa lugar ingon man sa mga endangered species, nga mao ang Black Shama o Siloy nga anaa namuyo sa Barangay Nug-as kon diin ipahigayon ang operasyon.
“I do not want another Naga landslide nga anha nalang ta mo-react kon naa nay kinabuhi nga nakalas. Right now, tua ang Penro didto ako gipadad-an og drone. I hope nakadala sila aron ilang makita gyud from above unsa nay itsura didto... We have to be proactive because I will not sit back and barely react to events that may become catastrophies,” matod sa gobernador. Matod ang gobernador nga andam siya nga moatubang sa korte batok sa mga naasoyng kompanya.
Gilaraw usab niya nga mopasaka og criminal environmental case batok sa mga tagtungod. / ANV