GIMANDO man tuod sa Kagamhanan sa Dakbayan sa Sugbo ang pagpasira sa tanang mga sementeryo sud sa upat ka mga adlaw, gikan sa Oktubre 30 ngadto sa Nobiyembre 3, 2020, apan ang paglubong ug ubang mga serbisyo sama sa cremation, magpadayon.
Kini subay sa giluwatan nga Executive Order Number 095 ni Mayor Edgardo Labella nga nagmando sa pagsira sa tanang mga sam-ang sa Dakbayan sa mao nga mga petsa.
Tumong niini aron way mga tawo nga magpanon sa pagpangadto sa mga sementeryo aron pagsaulog sa Adlaw sa mga Santos ug Adlaw sa mga Patay sa Nobiyembre 1 ug 2 nga tinuig nga gisaulog sa simbahang Katoliko.
Tumong sa kamandoan mao ang pag-limit sa mga tawo taliwa ning coronavirus pandemic bisan kon ang siyudad sa Sugbo ubos na sa modified general community quarantine (MGCQ).
“There is a need for the City Government of Cebu to temporarily close memorial parks, cemeteries, columbaries in the City during the All Saints Day and All Souls Day as well as the days leading to and after these events so as to prevent the expected influx and gathering of people inside these areas,” tipik sa EO ni Labella nga gipagawas sa Septiyembre 10, 2020.
Pasabot sa kamandoan nga ang pagduaw sa mga sementeryo ug columbary sa mao nga mga adlaw, gawas lang kon ikaw nag-uban sa lubong o pagsunog sa lawas, gidili.
Gitahasan sa mayor pagpatuman sa EO ang Cebu City Police Office (CCPO) nga gipangulohan ni Police Colonel Josefino Ligan, City Health Department ni Dr. Jeffrey Ibones, Cebu City Disaster Risk Reduction and Management Office nga gipangulohan ni Ramil Ayuman.
Apil sab sa gimanduan ni Labella ang Prevention Restoration Order Beautification Enhancement (PROBE) ug Business Permit and Licensing Office nga gipangulohan ni Atty. Jared Limquiaco.
Ang di motuman sa kamanduan sa mayor nagkahulogan sa pagkanselar sa ilang mga permit gikan sa City Hall.
“Violation of this order by any natural or juridical person may lead to the revocation of their mayor’s permit ang business permit,” dugang sa EO ni Labella.
Si Labella niawhag sa mga tawo sa dakbayan sa pagbisita sa lubong sa ilang mga minahal sa kinabuhi sa di pa ang kasaulogan sa Adlaw sa mga Santos ug Kalag, apan sundon gihapon ang minimum health protocol para malikayan ang pagtakod sa Covid-19.
Si Cebu City Councilor Joel Garganera, Emergency Operations Center (EOC) deputy chief implementer, niingon nga ang 17 ka checkpoints sa siyudad i-activate atol sa upat ka adlaw nga pagsira sa mga sementeryo. Kini aron kapugngan kon dunay mga tawo nga mosuway sa pagsulod sa mga sa mga sementeryo sa mao nga mga adlaw.
Si Garganera niingon nga makigtagbo siya sa mga barangay kapitan sa dakbayan aron kahisgutan ang pagbuhig balik sa ilang mga checkpoint.
Matod niya nga lisod ang paghimo og mga paagi tungod sa kadaghan sa mga tawo nga manuaw sa mga sementeryo matag adlaw.
Iyang gidayeg ang sayo nga pagpahibawo sa mayor sa pagpasira sa mga sementeryo aron makabisita og sayo ang publiko sa ilang mga mahal nga ningtaliwan na.
“Para ma-condition ang huna-huna sa taw ba nga close ang cemeteries on that day,” matod ni Garganera.
Ang Cebu City dunay 23 ka publiko ug pribadong mga sementeryo. / dugang taho ni JJL