SAGOL nga reaksyon ang gibati ni Cebuana Olympian Mary Joy Tabal sa pag-anunsiyo sa International Olympic Committee (IOC) nga ipahigayon ang Summer Games sunod tuig, anaa o wala hulga sa coronavirus disease 2019 (Covid-19).
Ang IOC wala nay plano nga mouswag og balik sa Tokyo Olympics, nga orihinal nga gikatakda niadtong Hulyo ning tuiga apan nauswag sa sunod tuig sa samang buwan tungod sa hulga sa Covid-19.
“For me dili lang sa ko morisk if kay even though under MGCQ (modi ed general community quarantine) nata diri sa Cebu City and allowed na ang mag-outdoor run, still dili gihapon ta safe sa virus,” pasabot ni Tabal sa Superbalita.
“Dili ko ka 100 percent nga maka-commit nga mo-go ko for Olympic slot if wala pa ang vaccine. Moapil paman gud mi og qualifying races,” ingon sa 2016 Rio Olympian.
Si Tabal nag-training sa iyang panimalay sulod na sa unom na ka mga buwan tungod sa hulga sa Covid-19.
Ang iyang ulahi nga kompetisyon mao ang 30th Southeast Asian (SEA) Games niadtong Disyembre sa miaging tuig.
Pasabot ni Tabal nga kinahanglan niyang molarga sa gawas sa nasod aron makaapil sa Olympic Qualifying events apan lisod kini niyang buhaton gumikan kay dili pa man tugtan ang non-essential travel paingon sa gawas sa nasod.
“If allowed na mo-travel and training abroad, seguro pwede na nga mosuway ko. Mas maayo if naa na gyu’y vaccine kay kana man gud ang makapaubos sa risk nato,” pasabot niya.
Si Tabal mao ang unang Filipina marathoner nga mi-qualify ug mitapos sa 42-kilometer nga lumba sa Olympics, iya kining nakab-ot upat na ka-tuig ang milabay sa Rio de Janeiro, Brazil.
Daghang mga lumba ang iya untang apilan sa sayong bahin ning tuiga nga pulos Olympic qualfying apan tanan pulos nakanselar o nauswag.
“Wala pa mo-con rm nako ang Standard Chartered Hongkong Marathon ug Tokyo Marathon, waiting pa ta sa ilang email if kanus-a na ang new dates. End of August ilang ingon unta pero wala pa man,” saysay ni Tabal.
Matod ni Tabal nga kon tanawon ang aspeto sa paugnat sa kusog, maayo ang lakang nga dayunon ang Olympics apan kinahanglan ma garantiya ang kaluwasan sa liboan ka mga atleta.
“For the sake lang gyud seguro nga-celebrate nato ang Olympics maong ilang idayon bisan naa pa ang Covid-19. Pero para nako nindot gyud unta nga we’ll be able to have the Olympics nga nag-celebrate ta,” matod ni Tabal.
“Kana untang ma-worryfree and celebrate gyud tanan. Daghan pa kaayo og ‘what ifs’ naa pa ang hulga sa Covid-19, mas maayo unta mo-compete nga more on celebration,” pasabot niya.
Bisan pa man sa iyang pag duha-duha, si Tabal nagtuo nga andam ug preparado ang host nation Japan aron maseguro ang kaluwasan sa mga sumasalmot sa Olympics kung dili pa mawala ang Covid-19 sunod tuig.
“Kon naa pa ang Covid-19 and madayon gyud siya, seguro pangandaman gyud na sa Japan and naay saktong protocols ana para safety ang tanan. Ang uban man pud countries karon kay medyo okey na sila. Diri lang sa atoa kay hinay man gyud atong progress,” sigon niya.
Ang bise-presidenti sa OIC nga si John Coates mipahibalo sa tibuok kalibutan niadtong Lunes nga dili kapugngan ang Tokyo Olympics sunod tuig ma-anaa o wala na ang virus.
“It will take place with or without Covid. The games will start July 23 next year,” matod Coates.
“Now very much these will be the Games that conquered Covid, the light at the end of the tunnel.”