Adunay giplanong dako nga liga ang basketball personalities sa Sugbo kon mahibalik na sa normal ang basketball scene nga nahunong og sobra unom na ka mga buwan tungod sa hulga sa coronavirus disease 2019 (Covid-19).
Ang maong liga susama sa estilo sa panalay league nga gibuhat sa mga probinsiya sa Mindanao ug Visayas, matod ni basketball coach Chelito “Marvin” Caro sa Bleacher Talk Cebu nga gi-host ni Rico Navarro.
“So far kanang gitawag nato nga Vis-Min (Visayas-Mindanao) Super League is on process na sige pami og meeting about it pero wala pa gyud ta kalihok kay tungod naa man ning pandemiya,” pasabot niya.
Ang kanhi miyembro sa Gilas Pilipinas ug Cebu City Councilor Dondon Hontiveros maoy giplano nga himoung commissioner sa Vis-Min Super League kon madayon ang plano sa liga.
"Gibuhat ni nato siya para sa mga player from Visayas and Mindanao nga naa silay maduwaan after sa ilang collegiate league. On progress pa ta ani karon,” sigon ni Caro.
Apil sa inisyal nga plano mao ang pagkuha og unom ngadto sa walo ka teams sa Visayas ug Mindanao.
“Mga team sa Visayas ari lang moduwa and teams sa Mindanao didto ra para dili dako gasto sa logistics. Ang Top 2 sa Visayas ug Top 2 sa Mindanao mao na ang mag-abot sa next round,” pasabot ni Caro.
Giplanohan nga tagaan og prayiridad ang homegrown talents apan tugotan pud ang teams nga mobutang og import o ex-PBA players sa ilang
lineup aron mas mo nindot ang mga duwa ug maparehas kini sa panalay leagues.
Si Caro ug Van Halen Parmis mao ang guests sa Bleacher Talk nga mihisgot sa ilang mga kasinatian sa panalay (pay-for-play) nga liga. / RSC