NASIKOP sa Toril Police Station ang usa ka magtutudlo sa Panabo City human sa gilusad nga buy-bust operation Biyernes sa buntag, Septyembre 11, 2020 sa R. Castillo Street, Barangay Gov. Vicente Duterte, Agdao District, Davao City.
Ang suspek nailhang si Joseph (tinuod nga bansagon gipatago sa pamilya) 34-anyos, public school teacher ug residente sa Barangay San Antonio, Agdao.
Sumala sa kapulisan nga dugay na nilang gipanid-an ang lihok sa suspek gumikan sagad mga parokyano niini sa area of responsibility (AOR) sa Toril Philippine National Police (PNP).
Atol sa transaksiyon gilayong giposasan ang suspek ug nakuha sa iyang posisyon ang motimbang 1.125 gramos nga gituohang shabu nga dunay street value nga P18,000.
Tuig 2014, ang suspek miintrigo og duha ka bricks nga cocaine sa Bunawan Police Station human giingong ilang nakita uban sa laing usa pa sa AOR sa Bunawan luyo sa nadiskubrehan nga mga bricks sa cocaine sa usa ka container van sa usa sa mga yards sa dapit.
Hinuon, wala pa mihatag og opisyal nga pamahayag sa bahin sa suspetsado samtang ginaproseso sa kapulisan ang pagpasaka og kaso batok sa suspek didto sa korte.