GISUGDAN na sa junior featherweight contender nga si Albert Pagara ang bag-ong hugna sa iyang boxing career human siya pormal nga mipirma og kontrata sa international boxing stable nga MTK Global.
Ang 26-anyos nga si Pagara nahimong free agent sa dihang nanirado ang ALA Boxing Gym human sa 35 ka tuig nga operasyon tungod sa epekto sa pandemiya ug pagkasirado sa ilang long-time broadcast partner nga ABS-CBN.
Si Pagara miingon sa report sa SB Nation nga aduna pa siyay ikabuga sa iyang boxing career ug mao kini ang rason nga mipirma siya sa MTK Global ug D4G Promotions nga mao nay modumala sa sunod niya nga mga away.
Gipasalamatan pud ni Pagara (32-1, 23KOs) ang iyang kanhi team ug promoter ang Cebu-based ALA stable kay kon dili tungod nila di niya makab-ot ang kalampusan sa iyahang professional boxing career.
Ang lumad nga taga Maasin City, Southern Leyte miingon sa laing report sa boxingscene.com nga nalipay ug mapasalamaton siya sa oportunidad nga malakip sa MTK Global, nga mao ang gagunit sa pipila ka dagkong pangalan sa pro boxing.
Ang junior featherweight contender nga si Pagara, ranked No. 7 sa World Boxing Organization (WBO), mao ang unang Pinoy nga mipirma og kontrata sa MTK Global.
Usa sa mga notado nga bag-ong boxers sa MTK Global mao sila reigning junior lightweight titlist Joseph ‘Jo Jo’ Diaz ug ang walay pilde nga middleweight Lorenzo ‘Truck’ Simpson (8-0, 5KOs).
Kining maong lakang gibuhat sa MTK aron palapdan ilang boxing stable gawas sa United Kingdom, Ireland ug Middle East.
Ang chief strategy officer sa MTK Global nga si Paul Gibson miingon nga interesado sila sa Filipino boxing market ug gikalipay nila ang pagkuha kang Pagara tungod maka-abli kini’g koneksyon sa mga Filipino, nga ilado nga die-hard fans sa boxing.
Gidugang ni Gibson nga si Pagara usa ka maayong dugang sa ilang bantamweight boxers kauban sila Michael Conlan, Thomas Patrick Ward ug Davey Oliver Joyce.
Gipasabot ni Gibson nga determinado silang tabangan si Albert aron maabot niya ang “next level” sa iyahang boxing career.
Si Pagara midaog sa iyang unom ka ulahing mga away human niya makuha ang iyang bugtong pilde sa mga kamot ni interim junior featherweight titlist Cesar Juarez niadtong 2016. Si Juarez mitumba kang Pagara sa ikawalong hugna sa ilang away.
Ang uwahing away ni Pagara mao ang impresibo nga 1st round KO batok kang Ratchanon Sawangsoda niadtong Agusto sa miaging tuig.
Si Pagara miingon nga gusto niya makab-ot iyang mga pangandoy sa boxing ug iya na kining gisalig karon sa iyang bag-ong tigdumala.
Ang MTK Global mao pud ang gagunit sa dekalidad nga mga boksidor sama nila heavyweight champion Tyson Fury, Billy Joe Saunders, Carl Frampton, Josh Taylor, Terry Flanagan, Charlie Edwards ug Rocky Fielding. /