Nakamatikod ka ba nga human nimo og sulob sa mask, manimaho imong gininhawa? Matod sa dentista, Dr. Arkhe de leon, daghang rason nganong manimaho ang baba di lang sa pagsegi og sul-ob og mask nga maoy mibuot sa baba.
Usa ini ang bacteria nga nagpuyo sulod sa baba labi na tong dunay daot nga ngipon o dagha’g kiki subra sa kinaon nga nanago sa luyo sa ngipon unya di ma-abot sa paglimpyo gamit ang toothbrush. Ang ubang bacteria sama sa ugam mipilit sab sa alingagngag o dila maong dapat apilon kini sa paglimpyo.
Ang uban sab tungod sa sinus labi na kung mapundo ang sip-on nga dunay bacteria.
Laing rason ang acidity sa tiyan. Ang tawong ulceron o ba kaha gigutom kay way sulod ang tiyan, aslom og gininhawa maong ma bad breath sab.
Kitang tagtungod di dayon makadipara kung nanimaho ba atong baba kay naanad naman ta og sinimhot ini. Gani kung mag-nganga matulog o hagok, di ka na makapanimaho sa kaugalingong gininhawa inig mata kay naanad naman sa baho.
Laing rason sa maka pabaho kining pag-panigarilyo ug pagpanabako og pagkaon og mga isog og baho sama sa ahos, bombayo o buwad.
Puno ni Dr. de Leon, aron di mobaho ang baba kinahanglang mag-toothbrush ka duha sa usa ka adlaw mga 2 ka minuto unya seguraduhon nga ma-apil og limpyo ang luyong bahin og dila kay kini maoy paboritong tago-anan sa bacteria.
Angay sab mo-inum og daghang tubig aron di mo espeso ang laway nga maoy maka-ingon sa baho.
Mas maayong mogamit sab og mouth wash unya molimog-mog mga 30 segundo para mamatay ang nahabiling bacteria.
Importante sab ang regular nga pagbisita sa imong dentista aron malimpyuhan og maayo imong daot sa ngipon ug matangtang ang mga puti-puti nga mipilit sa tonsils. Kung dunay sinusitis, maayo sang ipa-check-up kini sa espesyalista aron matambalan.
Ayaw ka-uwaw pangutana sa imong kapamilya sa baho sa imong gininhawa kay sila may mas makasimhot ini.
Pwede sab mo usap og chewing gum labi na tong mint fl avor kay makapawala sab kini sa baho.