Nahisama sa unos ang Covid-19 nga mihamag sa kanasoran. Nag-una ang US gisundan sa Brazil, India, Russia ug Peru. Mihari ang kahadlok, mipuyo ang kabalaka, gibilanggo sa kahingawa ug naglomlom ang kalisang. Walay gipili sa misteryusong balatian. Naigo sa kagaw ang armadong kusog, artista, opisyal, kaparian ug yanong katawhan. Sing git sa panaghiusa , pagsanong sa awhag sa gobyerno, pag-ampo, pagsabak sa hugot nga pagtuo uban sa pangindahay sa maayong panglawas nga maoy nagtimon sa nasodnong ekonomiya.
Kadtong ostrich ug ubang hayopan nga nanggawas sa kadalanan timailhan nga padayon pang nagdagan ang giyera sa panglawas ug krisis sa ekonomiya sumala pa sa mga eksperto. Apan walay unos nga dili molurang bisan unsa kapintas sa bagyo.
Walay kinutoban nga pasalamat sa dili masukod nga kaisog sa frontliners nga bisan nag-ong-ong sa kakuyaw ang pamilya milahotay pag-asdang sa bayanihong kaakohan. Sila ang manggugubat.
Sa Bill of Rights kagawasan ang paglihok ug pagbiyahe apan napugngan alang sa seguridad ug kaluwasan. Wala mosalir ang Data Privacy Act kon itandi ang kabulahanan. Hinunoa, girespito ang Anti-Discrimination Act. Dunay nahimugso ning panahon sa pandemya ginganlan og Covid Marie, Corona Mae, Luckdown ug Noah Clynt.
Danyos sa ekonomiya ug sagradong kinabuhi pait ug subo nga palandongon. Nag-una ang Pilipinas sa Southeast Asia. Cebu City nag-una sa Central Visayas ug nahimong epicenter sa nasod kauban sa Quezon, Manila, Parañaque ug Makati.
Laksot palandongon nga gipatay ang mag-uuma Junie Piñar sa Agusan ug kanhi sundalo Winston Ragos sa Quezon human misukol sa lagda sa lockdown. Social Amelioration Program (SAP) nalawgaw gisanapan sa pamolitika, anomaliya ug pabor-pabor. Kwalipikado wala makadawat-nakadawat apan dili kwalipikado. Pres. Rodrigo Duterte mitanyag og 30,000 pesos sa makataho sa tinonto. Liboan na ka mga kaso batok sa mga social workers ug opisyal ang nadawat sa pangulo sa Presidential Anti-Corruption Commission (PACC) Greco Beljica.
Agusto 2020 nakautang na sa bangko ang gobyerno og P1.72 trillion, sumala ni Rosario de Leon sa Bureau of Treasury. Ang economic stimulus package nga Bayanihan to Recover as One Act napasar na sa kongreso dugang sa unang Bayanihan to Heal. Giandam na sab ang P4.506 trillon sa 2021 annual budget pagpalambo sa health care systems, igong pagkaon, investments, infrastructures ug tabang sa komunidad. (csa_1156@yahoo.com / 09064648954)