Ayuda ni Labella sa apiking sektor sa pag-Lockdown

ANG Cebu City Government mohatag og ayuda ngadto sa mga sektor nga apektado sa pagsirado sa mga menteryo sugod sa Oktubre 30 hangtod sa Nobyembre 3, 2020.

Si Mayor Edgardo Labella nagkanayon nga bugas ug de lata ang iyang ihatag ngadto sa mga manindahay og kandila, buwak ug sepulturero isip sagang sa ilang kagutom sanglit limitado ang ilang kita sa maong mga adlaw.

Ang mayor niisyu na og memorandum ngadto kang Francis Abangan, pangulo sa Department of Social Welfare and Services (DSWS) para makig-alayon na ngadto sa mga barangay officials kansang mga dagkong pampubliko ug pribadong ospital nahimutang.

“Atong gi require ang DSWS nga magkuha sila og lista sa mga manindahay og buwak, kandila ug sepulturero dinhi sa dakbayan sa Sugbo para

atong mahatagan og ayuda, bugas ug de lata," padayag ni Labella.

“Atong tan-awon kon mapaigo pa kini karon kay manghatag pa raba ta sa mga PUJ driver, mga musikero nga wala pa sad intawon makatrabaho, kon mahatag nato ang tag 25 ka kilo labing maayo apan kon dili tag 15 kilos atong ihatag apil na ang de lata,” dugang sa mayor.

Lakip sa mga barangay sa dakbayan sa Sugbo diin adunay dagko nga mga samang mao ang Carreta, Calamba, Labangon, Poblacion Pardo, barangay Luz, Banilad ug uban pa.

Si Labella nanawagan ngadto sa mga tawo nga mosabot sa gihimong aksyon sa City Government nga mao sab ang gihimo sa Manila City aron dili na mograbe pa ang kaso sa virus sa siyudad.

“Hinaot nga masabtan sa katawhan sa dakbayan sa Sugbo nga kining pagsira nato sa mga menteryo nakapasubo sab ni nako kay tradisyon natong mga Pilipino ang pagduaw sa atong mga minahal sa kinabuhi labi na atong mga ginikanan pero unsaon taman nga nia man kita taliwa sa pandemic so akong gihangyo ang inyong pagsabot aron atong mapugngan ang posibleng pagkatap sa Covid-19,” paghulagway ni Labella.

Iyang giawhag ang mga tawo sa pagbisita sa ilang mga minahal sa kinabuhi nga nitaliwan sa mosunod nga mga semana ug lapas na sa Nobyembre 3 aron malikayan ang tapuktapok nga maoy usa sa hinungdan unya sa pagkatap sa coronavirus disease 2019 (Covid-19). / PAC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph