DRUGAS, personal ug may labot sa iyang pagka kanhi pulis ang mga gisubay nga motibo sa pagbanhig-patay sa kanhi pulis ug iyang 19 anyos nga bata Huwebes sa buntag, Septiyembre 10, Sitio Mohon Barangay Tisa, dakbayan sa Sugbo.
Matod ni Police Colonel Josefino Ligan, hepe sa Cebu City Police Office (CCPO), nagpadayon pa ang imbestigasyon sa iyang mga sakop kung kinsa ang mga responsable sa pagpaatay kang Ruben Requinto Quita ug ang iyang anak niini nga si Gavin Rheuben, 19.
Niadtong 2016 pa nag absent without official leave (Awol) nga hinungdan nga gitaktak kini sa serbisyo.
Nakadawat, matod pa, og intelligence information si Ligan nga nalambigit sa ilegal nga kalihukan si Quita sa dihang aktibo pa sa PNP.
Nadestino kaniadto sa intelligence branch sa CCPO ang biktima apan nabalhin sa Police Regional Office (Pro) 7 niadtong 2013. Tungod niini, gipasubay pa karon kung kinsa ang nag tinguha nga patyon ang maong kanhi pulis.
Nagduda si Ligan nga kauban sa sindikato ang nag himo sa krimen o ba kaha aduna siyay na dispalko sa ilang grupo.
Apan giklaro hinuon ni Ligan nga wala lang sila maka tutok sa ilegal nga drugas ug ila usab nga tan-awon ang kanhi trabaho niini nga mao ang pagka pulis.
Dili na motukod ang kapulisan sa dakbayan sa Sugbo og special investigation task force tungod kay dili naman aktibo sa serbisyo.
Gibutyag ni Ligan nga dako kaayong hagit sa mga imbestigador karon ang pag-ila sa mga mamumuno tungod kay walay CCTV nga namuntar sa dapit sa krimen. / AYB