PATAY ang drayber sa E-bike human pusila sa duha ka mga mamumuno nga nagsakay og motorsiklo sa Barangay Tanke, dakbayan sa Talisay nadtong Huwebes, Septiyembre 10, pasado alas 4:00 sa hapon.
Si Patrolman Milfred Labitad sa Talisay City Police Station nila sa biktima nga si Albert Hermosisima, 27, ug molupyo sa Sityo Tunga, Tanke.
Walay nakaila sa mga mamumuno.
Dugang ni Labitad nga sa kasamtangan ang ilang gisubay karon nga anggulo ang posibleng away personal tungod sa pamahayag sa kapuyo sa biktima nga dunay nakala lis si Hermosisima duha na ka tuig ang milabay.
Ang kapuyo nga si Lilybeth Lastimosa, 25, niingon nga gihatod siya nianang udto ug nisaad kuhaon sila kuyog sa ilang anak inig kagabii.
Sa laing bahin, gidala sa balay tambalanan ang usa ka gwardya human pusila sa lalaking nagsakay usab og E-bike eskina sa South Road Property (SRP) habig sa Barangay Dumlog, Talisay sa susamang adlaw.
Ang biktima nailhan nga si Leo Domingo Tolen, 50, guwardya sa tower sa usa ka telecom company nga anaa sa Canton Beach, Barangay Cansojong.
Samtang, usa sab ka Rando Cabrera, 24, ang napagan sa maong pagpamusil.
Nailhan ang suspek nga si Armando Cabeco, hingkod ang panuigon, ug taga Canton Beach, Cansojong. Sa inisyal nga imbistigasyon sa kapulisan nasuta nga padung motrabaho ang biktima sakay sa iyang bisekleta.
Apan nakit- an ang biktima sa suspek ug naabtan sa signal sa traffic light ug didto na pusila ang biktima sa suspek sa makatulo kahigayon.
Ang uban nga nagmaneho nga natupad sa traffic light nga nagmotorsiklo usab ang nag-iyahay og pangambak pasali pod apan naigo gyud si Cabrera sa saag nga bala.
Dali nga nisibat ang suspek sakay sa iyang E-bike samtang ang mga samaran gidala sa tambalanan.
Si Ian Villaflores, sakop sa City of Talisay-Traffic Operation Development Authority (CT-TODA) niingon nga nahibong siya nganong nangatumba ang nagmotor.
Diha nahibal-an nga adunay namusil sa dihang nagdalidali og sibat ang drayber sa E-bike. Ang biktima nakaila sa suspek ug niigon nga selos ang motibo tungod sa pagumangkon niini nga nagsige og duol kaniya. / BBT