LABING minos 90 ka mga pamilya sa Dakbayan sa Talisay ang nangawadan og mga balay sa sunog sa alas 10:25 sa buntag, septiyembre 12, 2020 sa duha ka mga sityo sa Barangay Tanke.
Ang pagkasunog sa 75 ka mga panimalay sa mga Sityo Kilawan ug Sityo Kasambagan nagbilin og labing minos P1 million nga danyos. Wa hinuoy naangol atol sa sunog.
Si Talisay City Fire Marshall Senior Inspector Arnel Abella sa interview sa Superbalita Cebu, niingon nga ilang nadawat ang alarma alas 10:25 sa buntag. Wa magdugay, ilang giisa sa second alarm hangtod sa third alarm tungod sa nagdasok nga mga balay sa lugar.
Tungod sa kahagip-ot sa agianan ug gipang-park nga mga E-bike, naglisod sila sa pagsulod gilayon sa dapit aron pagkombate sa kayo.
Nakaagi man tuod sila, apan nakadako na ang kayo nga paspas nga milamoy sa mga balay nga gama sa mixed nga concrete ug light materials.
Sa ilang imbestigasyon, nagsugod ang kayo sa usa ka balay nga dunay welding machine, apan giklaro ni Abella nga ila pa kining susihon.
Usa sa mga nasunogan nga si Teodisia Mabanag, 61, fish vendor, nibutyag nga bisan gamay wa silay nadala nga mga gamit apil na mga sapot. Mga biktima sa sunog gipahimutang sa barangay gym. /BBT