Temporaryong pasirad-an sa lokal nga kagamhanan sa dakbayan sa Mandaue ang tanang pribado ug pampublikong sementeryo gikan sa Oktubre 30 hangtod Nobiyembre 4, 2020.
Kini human magsabot ang local task force ug si Mandaue City Mayor Jonas Cortes nga dako ang peligro kon ipadayon tradisyonal nga pagsaulog sa Kalag-Kalag.
Gipasabot ni Atty. Si John Eddu Ibañez, executive secretary ni Cortes, nga dili gusto sa mayor nga mosaka nasad ang mga kaso sa coronavirus disease kon ipadayon gihapon ang pagsaulog sa kalag-kalag, diin tanang mga tawo moadto sa mga sementeryo aron maghalad og pag-ampo sa mga mitaliwan na.
Mopagawas unya og executive order si Cortes kabahin niini.
Bisan pa sa temporaryong pagsira sa mga sementeryo, matod ni Ibañez nga dili kini pasabut nga mao ra kini ang higayon nga makabisita sa ilang gihigugma. Gitugot usab ang mga paglubong sa mao nga mga adlaw. / KFD