KON naanad kag binuang sa pagsuwat sa contact tracing forms sa imong pagsud og mall o bisan asa nga establisemento, undanga na kini kay mahimo kang mabilanggo sa imong gibuhat.
Ang pagmugna-mugna og ngan ug ubang mga impormasyon sa contact tracing forms maisip nga falsification, busa mahimong ma pasakaan ka og kaso, pahimangno ni Mayor Edgardo Labella.
Ang mga establisemento nagbutang og contact tracing forms samtang padayong naghulga ang coronavirus disease (Covid-19).
Rekisito kini sa kagamhanan aron masayon ang pag-contact trace kon dunay infection sa establisemento.
Sa Facebook post ni Konsehal Joel Garganera niadtong Septiyembre 10, 2020, gipakita ang mga sampol sa contact tracing forms kundiin ang gibutang nga mga ngan kay gikan sa movie characters.
Matod ni Labella nga ang sayop nga impormasyon kay makaapekto sa contact tracing nga ginabuhat sa dakbayan sa Sugbo.
“Kinahanglan gyud nga they should be identified, mao gyud nay pinaka basic,” segun ni Labella.
“Kay how could we implement effectively and efficiently (the contact tracing) kung ang entry nga ilang gibutang dili mao, laing ngan,” matod niya.
Si Garganera, kinsa Emer gency Operations Center (EOC) deputy chief implementer, nipasabot nga ang di tukma nga impormasyon nga gibutang sa contact tracing forms kalapasan ubos sa Section 9 (b) sa Republic Act 11332 kun Mandatory Reporting of Notifiable Diseases and Health Events of Public Health Concern Act.
Ang Seksyon 9 sa RA 11332 kay nag-asoy sa mga prohibisyon nga aksyon ug apil na ang ““tampering of records or intentionally providing misinformation.”
Giawhag ni Garganera ang mga establisemento sa pagsiguro nga sakto ang gipanghatag nga mga impormasyon sa ilang mga kliyente ug kustomer.
Ang EOC mirekomendar sa mga establisemento sa pagtan-aw sa mga contact tracing forms ug valid nga identification card kon pareho ba ang impormasyon nga gibutang.
“However, we would like to shift the responsibility to establishment to ensure that those entering their premises will provide accurate info because this is for their own good,” matud ni Garganera.
Matod ni Garganera nga ang tarong nga pagfill up sa mga forms kay usa na ka konstribusyon sa publiko sa kombate sa dakbayan batok sa coronavirus disease (Covid-19) nga pandemya.
“The government is doing our best to address this pandemic, I think filling up the forms properly is just a small contribution the people can make to help us fight this pandemic,” segun sa konsehal./