MOABOT sa 500 ka mga kawani sa lokal nga kagamhanan sa lungsod sa Consolacion ipaubos sa real time- polymerase chain reaction (RT-PCR) test kun swab test sa coronavirus disease (Covid-19).
Kini nunot sa tinguha ni Consolacion Mayor Joannes “Joyjoy” Alegado nga mahimong Covid-free ang mga nagtrabaho sa munisipyo.
Gihimo nga mandatory ang testing alang sa mga empleyado tungod kay sila giisip nga mga frontliner nga moatubang sa nagkalain-laing mga tawo matag adlaw.
“It started lang just yesterday. We are doing it in batches so as not to hamper the services of the municipality,” matod ni Alegado sa Septiyembre 12.
“Yes, all are highly encouraged so that we could really determine that everyone is Covid free for the time being,” dugang ni Alegado.
Una na nga mipadayag si Alegado nga ilakip usab sa pagpa swab test ang mga barangay worker, kapulisan ug ubang uniformed personnel ingon man ang mga magtutudlo sa pampubliko nga tunghaan.
Ang mga empleyado nga mopaubos sa pagsulay papaulion dayon ug mag isolate sa kaugalingon, di una motungha sa trabaho hangtod wala pa ang resulta sa test.
Gibutyag ni Dr. Fe Pardillo, municipal health officer (MHO) sa lungsod nga makuha na sulod sa duha o tulo ka adlaw ang resulta sa swab tests.
Kon mag positibo ang empleyado, hatagan gihapon kini sa ilang sweldo samtang nipailawom sa 14 ka adlaw nga quarantine. Alang sa mga regular employee, hatagan kini og Covid-19 leave diin di makuhaan ang leave credits niini.
Gawas sa sweldo sa maong empleyado, hatagan usab kini og mga ayuda atol sa ilang kwarantinas.
Apan unsay mahitabo kon magdumili sa pagpa swab?
“In case di sila musugot magpa swab, they must present their reasons. And will further undergo evaluation and monitoring,” pagpasabot sa mayor. (ANV)