Sestoso gustong DMC, PMSC mokuhag permit

ARON mahatagan og kahapsay ang kontrobersiya sa pag extract og dolomites sa lungsod sa Alcoy, makigtigom si Alcoy Mayor Michael Sestoso sa Dolomite Mining Corporation (DMC) ug Philippine Mining Service Corporation (PMSC) sa sunod semana.

Kini aron makigsabot sa mga nag dumala sa maong kompaniya nga motuman sa lagda sa Probinsya labot sa pag kuha og waste disposal permit (WDP).

Human nasuta sa kagamhanan nga namaligya na kini og gi dugmok nga dolomites sa lokal nga merkado.

“Mao na among i-hangyo nila nga mosanong sila sa balaod sa Probinsya kay mao man na ang naa sa provincial ordinance mana nga silay mangolekta unya ma-hatagan sad mi og share. Sa among bahin pabor sad gyud mi ana kay lokal naa may share,” matod ni Sestoso.

Sa 2019, gipadad-an og notice ang kompaniya nga molukat sa mga rekisitos sa Probinsya aron maka baligya kini sa lokal.

Atol sa pakighinabi sa mga tigbalita sa mayor sa Septiyembre 12, iyang gibutyag nga moabot sa 20 ka tuig na nga nag-operate ang maong kompaniya sa lungsod. Apan pasabot niya nga bisan pa og wala pa siya mapili isip mayor sa 2016, namaligya na og dolomites sa lokal nga merkado ang maong kompaniya.

Hinungdan nga wala na usab sila mikwestyon sa presensya niini sa lugar.

“Mga 20 years, 2000 naa naman siguro namalit og ginagmay. Pero dugay na gyud na sila maong nagtuo mi nga apil na sa ilang permit na,” matod ni Sestoso.

Gisuwayan sa mga tigbalita pagkuha sa habig ni Rodel Bontuyan, Provincial Environment and Natural Resources Office (PENRO), head kon duna na bay rekords ang kompaniya sa maong tuig apan wala motubag.

Asoy ni Sestoso nga bisan paman og moabot sa 20 na ka tuig ang operasyon sa Barangay Pugalo, giingong padayon nga nag monitor ang Mines and Geosciences Bureau (MGB) ug LGU sa lugar.

“Sa pagkakaron sa ilang monitoring sa MGB, wala man sila niingon nga naay kuyaw sa landslide kay kami sa LGU wala man mi capacity nga mosulti ana. Pero sa ilang monitoring, bato mana diha dili mana gisuhon,” matod ni Sestoso.

Moabot sa 300 ka konstituente ni Sestoso ang anaa na trabaho sa naasoyng kompaniya.

Matod niya angay nga makig hinabi sa mga opisyal nga nagduma tungod kay maapektohan usab ang panginabuhi sa mga tawo.

Hinuon gi klaro sa cease and desist Order (CDO) nga giluwatan ni Cebu Governor Gwendolyn Garcia nga di ang operasyon ang ipahunong, apan ang pagbaligya og dolomites sa lokal nga merkado.

Wala pay plano si Sestoso nga mopasar og ordinansa labot sa pagpahunong sa extraction kon di mouyon ang kompaniya.

“Ato pa na ipangutana sa legal kon maghimo og ordinance. If dili sila mo cooperate sa Province dili sad na sila maka baligya sa local.” (ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph