GIPAUBOS sa lockdown sulod sa 14 ka adlaw ang duha ka mga sityo sa usa ka arangay sa dakbayan sa Toledo tungod sa nagkataas nga kaso sa coronavirus disease (Covid-19) sa lugar.
Kini subay sa Covid-19 Task Force resolution No. 23 nga giaprubahan ni Toledo City Mayor Marjorie Perales.
Ang maong paagi gibuhat aron mapugngan ang pagkatap sa kagaw sa Covid sa siyudad.
Base sa uwahing impormasyon sa syudad, niabot sa 234 ang kinatibuk-an nga mga kaso. Sa maong datos nakatala og 66 ka mga positibong kaso ang Barangay Don Andres Soriano diin 12 ang aktibong kaso pagkakaron.
Tungod, niini gi-paubos sa lockdown sa Septiyembre 11 kutob Septiyembre 25 ang sitio DASUGA ug Bagong Buhay sa naasoyng barangay. Nanawagan ang syudad nga estriktong subayon ang mga lagda batok Covid-19 aron malikayan ang pagtakboy sa sakit. (ANV)