MIPAGAWAS og executive order si Mandaue City Mayor Joans Cortes aron pag-usab sa market schedule sa Mandaue City Public Market niadtong Biyernes, Septiyembre 11, 2020.
Matod sa mando, aduna nay bag-ong market day schedule nga ipatuman sa merkado ug ubang kasikbit nga mga establisemento sa may P. Gomez St., Zamora St. ug B. Ceniza St.
Gikan sa alas 5 sa buntag hangtod sa alas 5 sa gabi matag Lunes hangtod Sabado, ang Mandaue City Public Market ug ubang kasikbit nga establisemento mamahimo na nga maka-operate gikan sa alas 5 sa buntag hangtod alas 10 sa gabii.
Apan, abli kini alang sa publiko gikan sa alas 5 sa buntag hangtod sa alas 8 sa gabii.
Ang nahabilin nga duha ka oras gikan sa alas 8 sa gabii hangtod sa alas 10 sa gabii, mao ang panahon nga mag-disinfect ang mga tindera o sellers sa ilang pwesto.
Giklaro sa maong mando nga way labot ang mga establisemento nga di silingan sa merkado apan kinahanglan gihapon kining motuman sa curfew sa siyudad.
Sa una, sirado ang merkado ug kasikbit nga mga establisemento matag Dominggo tungod kay mao kini ang adlaw sa disinfection. Sa bag-ong mando, ablihan na sa publiko ang merkado matag Dominggo ug gibahin kini sa duha ka batches:
Matag Domingo, gikan sa alas 5 sa buntag hangtod sa udto, ang mosunod nga mga barangay mahimong makasulod: Barangay Casuntingan, Barangay Centro, Barangay Cubacub, Barangay Guizo, Barangay Ibabao-Estancia, Barangay Jagobiao, Barangay Labogon, Barangay Mantuyong, Barangay Opao, Barangay Paknaan, Barangay Tabok, Barangay Tawason, Barangay Tingub, ug Barangay Tipolo.
Gikan sa udto hangtod alas 8 sa gabii, ang mosunud nga mga barangay mahimong makasulud sa merkado: Barangay Alang-Alang, Barangay Bakilid, Barangay Banilad, Barangay Basak, Barangay Cabancalan, Barangay Cambaro, Barangay Canduman, Barangay Casili, Barangay Looc, Barangay Maguikay, Barangay Pagsabungan, Barangay Subangdaku, ug Barangay Umapad.
Ang schedule sa Lunes hangtod sa Huwebes mao gihapon ang sundon. Ang tanang musulod sa merkado kinahanglan magpakita sa ilang quarantine pass inig dayon og sulod ug padayon sab ang pagtuman sa minimum health protocol. (KFD)