DAGHAN ang natingala nganong sa kadaghang problema nga giatubang karon sa atong nasud, miabot pa gayod sa panghunahuna sa atong presidente ang paghatag og “Absolute Pardon” sa usa ka sundalong marino nga si Joseph Scoot Pemberton nga mipatay sa usa ka transgender nga si Jennifer Laude didto sa Olongapo City.
Buweno dili nato hatagan og halawom nga katahap kung may-pressure ba o wala, kay matud pa, wala man daw moagi sa Board of Pardon, pero, ang absolute pardon, exclusive kana nga gahum sa presidente, nga dili na moagi sa Board of Pardon, ni moagi pa og Korte Suprema iyaha ra gyud na, kung tawagon Executive power ug walay maka-kwestiyon.
Kon gihatag na sa imo ang absolute pardon, mahibalik na sa imo ang imong political rights, sama sa pagbuto ug pagdagan sa bisan unsang political position ug civil rights, pagsulod og trabaho sa gobyerno, pagsulod og legal nga kontrata sa gobyerno, pagdeposito ug pag-withdraw sa mga bangko, ug uban pa.
Mao kini ang unod sa absolute pardon nga gihatag sa atong presidente kang Pemberton, pero, ang rekord sa krimen nga iyang nahimo magpabilin ug dili kana ma-papas, kay ning-agi man siya og trial ug na konbikto sa sala nga pagpatay.
Pero kadyot lang, dunay mga pipila dinhi nga pangutana? Kung basihan nato ang giluwatang pahayag sa Regional Trial Court sa Olongapo City, nga nag-accumulate na daw ang iyang Good Conduct Time Allowance (GCTA) buot ipasabot sobra-subra na ang kabuotan nga gipakita sa usa ka binilanggo, ug dili na niya humanon ang napulo ka tuig nga sentensiya? Kay sama ra, nga gisilbihan na kini niya pinaagi sa GCTA, sa ato pa, “No need of Absolute Pardon?”
Duha ra ka punto ang silbing tubag niini, una, samok na kaayo, kay duna pa’y motion for reconsideration ang mga argabiyado, una nga mopalag, mao si Harry Roque kay siya ma’y abogado ni Jennifer Laude? Kay sa absolute pardon wanay gahum ang motion for reconsideration.
Kon atong hatagan og pagtagad ang laing bersyon sa katahap nga adunay pressure? May posibilidad, kay sa ato nang giingon nganong sa kadakong problema nga giatubang sa atong misantop paman gyud sa iyang hunahuna ang kaso ni Pemberton?
Timan-i baya nga ang mga dagkong mga negusyante sa mga nasud sa Europe, Australia, France nga may negusyo didto sa China, ila nang gi-full-out, gumikan sa bangi karon sa America ug China.
Sumala pa, kung matinuod man, nga may plano nga ilang ibutang dinhi sa Pilipinas ilang mga negusyo, apan tungod kay wala ma’y klaro ang baruganan sa Pilipinas nga pabor sa America maong wala gibutang dinhi sa ato.
Ang absolute pardon kang Pemberton basin kung gusto lang mobawi ang atong pangulo sa America, kay dili man maayong amigo ang China, ang gipakita nila nga makig-amigo sa ato, taphaw, tungod kay dunay nagpaluyong agenda.
Ang atong mga kampo sa military namatikdan na sa ubang mga Kongresistang kaalyado sa atong pangulo nga sa dili madugay mahimong spy sa China, kay ang third Telco ang DITO nga 40 percent niini iya sa China, mao namay gi-install sa atong military Camp?
Hinaut pa nga maagapan, kay dilikado nagmata la’g buntag si Delfin Lorenzana.