PIPILA ka mga adlaw nalang mao na ang tinuig sa pipila ka mga okasyon nga naandan sa kulturang Pilipino, mao ang Kalag-Kalag.
Mangadto gyod sa sementeryo ang mga nahibiling buhi nga mga pamilya, handumon ibabaw sa lubong ang mipanaw.
Tinuig gayod kini, Nobyembre 1 kung adlaw sa mga Santos ug ang Nobyembre 2 mao ang sa mga Kag, mao nang bibo ning mga adlawa sa mga nagkadaiyang sam-ang.
Apan ning bag-o lang, nahukman sa mga local government units (LGUs) sa tibuok nasud nga temporaryo nga sirhan ang sementeryo aron di mahitabo ang pagtinakdanay sa coronavirus disease (Covid-19).
Mandato sa matag LGU nga duna kini paghukom unsay angay ug hinanali nga aksyon aron malikayan ang local transmission sa Covid-19, maong si Davao City Mayor Sara Duterte-Carpio nagbutyag nga dili puwede nga ang kadaghanan sa maong adlaw, mangadto sa sementeryo.
Hinuon di man sirhan ang mga sam-ang, apan limitado kini, ug naghangyo si Mayor Inday nga kung mamahimo di una mangadto sa sementeryo; puwede moadto apan sa lahi nga mga adlaw, aron di magdungan.
Tinuod, usa ka maayong aksyon kini, tanang adlaw puwede moadto, apan hangyo lang nga kining mga adlawa, ang Nobiyembre 1 ug 2 mas maayong dili lang una.
Puwede ra gani nga sa balay lamang mag-ampo, dagkutan sila og kandila, uban sa hunahuna nga basin unya kung magginahi og ulo, sila ang mosunod sa menteryo.
Di ni kanunay ang Covid, naa ni katapusan, busa ning tuiga, mas maayong di lang una moadto sa sementeryo.
Hunahunaon sa kanunay, ang kinabuhi kausa ra moagi ning kalibutan, mao nang mag-amping ang tanan ug motuman sa gobyerno.