NASIBOG sa laing petsa ang gikahinaman nga debut ni kanhi Cebu-based boxer Mark Magsayo sa MP Promotions human miatras ang iyang kontra nga si Jose Haro sa ilang away karon untang Septiyembre 23, 2020 sa Estados Unidos.
Ang Amerikanong si Haro, 33, mianunsiyo nga moretiro na lang kini sa boksing tungod ug alang sa iyang pamilya.
Gihangyo ang kanhi Olympian sa iyang pamilya nga moundang na sa boksing kay mabutang sa peligro ang kinabuhi niini.
Gikasubo ni Magsayo ang maong desisyon ni Haro apan iya kining girespeto kay alang kini sa pamilya.
Ang 26-anyos nga Bol-anon nagpahibalo nga nangita na og laing kontra alang kaniya ang presidente sa MP Promotions nga si Sean Gibbons.
Si Haro mibiya sa pro boxing nga adunay rekord nga 15-1-1, 8KOs.
Ang Premier Boxing Champions, ang maoy mosalida sa away ni Magsayo, misibog sa away karong Oktubre 3, 2020 aron aduna pa’y igong kahigayunan alang sa pagpangita og bag-ong kontra sa kanhi ALA fighter.
Miingon si Magsayo nga magpadayon lang siya sa iyang training samtang maghuwat pa sila sa bag-ong kontra.
Nagpanikad na si Magsayo nga makabalik sa ring kay ang uwahing away niini niadto pang Agusto sa miaging tuig.
Bisan og usa ka tuig na nga wala siya makaaway, nagpabiling usa sa mga paglaom sa boksing si Magsayo tungod sa iyang impresibo ug limpyo nga rekord nga 20-0, 14KOs.
Mipirma og kontrata si Magsayo sa MP Promotions niadtong tuig 2020 ug gitabangan siya ni Gibbons nga makalupad padulong sa Amerika bisan estrikto ang lockdown measures tungod sa pandemiya.
Una nang gisulti ni Gibbons nga human sa duha or tulo ka mga away, puwede na nga isangka si Magsayo alang sa usa ka world title fight.
Si Magsayo kay rated No.5 sa World Boxing Council (WBC) ug No. 11 sa World Boxing Association.