SI TALISAY City Mayor Gerald Anthony ‘Samsam’ Gullas nibisita sa mga pamilya nga nasunogan sa Tangke National High School diin temporaryong gipahiluna.
Matod ni Gullas, inay tulo ka adlaw nga mohatag og pagkaon ang siyudad gikan sa pamahaw, paniudto hangtud na panihapon, himuon na kining upat ka adlaw. Dugang ni Gullas nga lauman kini sa mga residente sa Sityo Kilawan ug Sityo Kasambagan sa Barangay Tangke sa maong siyudad.
“The fourth day maybe late Tuesday or early Wednesday mahatag na ang cash financial assistance gikan sa siyudad ngadto na sa mga nasunogan,” matod ni Gullas.
Sumala sa mayor P10mil ang madawat nga cash financial assistance gikan sa panudlanan sa siyudad sa Talisay samtang duna usab madawat kadtong nasunogan nga nag-abang lang apan ubos nga kantidad sa kadtong nanimuyo gyud sa maong lugar.
Ang kagamhanan sa dakbayan sa Talisay nangayo usab og suporta sa uban pang mga ahensiya sama sa Department of Social Welfare and Development (DSWD)-7 ug sa opisina ni Gobernador Gwendolyn Garcia ingon man sa iyang apohan nga si Kongresista Eddie Gullas.
Samtang sa kaulohan sa buhatan ni Senador Bong Go nisaad na usab nga mohatag og hinabang sa mga nasunogan ug gipaabot pa lang ang skedyul sa pag-apud-apod niini.
Si Mayor Gullas nagpasalamat sa katawhang Talisaynon nga nihatag sa ilang suporta ug donasyon sa nagpadayon nga donation drive.
Ang kapitan sa Barangay Tangke, Nelson Cabanes, sa pakighinabi sa Superbalita Cebu miingon nga sa kinatibuk-an nga nalista sa mga nasunogan, moabot sa 101 ka pamilya ang naapektuhan diin dunay 446 ka mga indibiduwal.
Karon, Septityembre 14, mopahigayon sila og emergency meeting uban sa iyang mga konsehal aron pagdesisyon sa pagdeklarar og state of calamity sa ilang barangay nunot sa nahitabong sunog. (BBT)