KAPIN sa tunga sa milyon ka pesos nga kantidad sa gidiling drugas base sa Dangerous Drugs Board (DDB) value ang nasakmit sa managlahing operasyon.
Ang mga operatiba sa Drug Enforcement Unit (DEU) sa Talisay City Police Station (TCPS) nilusad og operasyon batok sa ilegal nga druags niadtong Sabado sa gabii, Septiyembre 12.
Ang anti-illegal drugs operation ubos sa kamanduan ni Police Major Gerard Ace Pelare, hepe sa TCPS, nga niresulta sa pagkasikop sa siyam ka mga durugista.
Sa unang hugna sa buy-bust, nasikop si Emmanuel Dejan, 40, ug molupyo sa Sityo Mananga sa Barangay Tabunok, nga nakuhaan og 0.63 gramos nga shabu.
Si Marvin Deiparine, 23, sa Barangay San Isidro, nakuhaan usab og 5.33 gramos nga shabu.
Nadakpan usab si Jerby Cabanes, 33, ug Junrey Radan, 38, taga Barangay Tangke nga gikonsiderar nga usa ka High Value Individual (HVI) nga nasakmitan og drugas nga nitimbang og 6.02 gramos.
Nisunod sab dayon sila si John Paul Cabaluna, 24, ug Cindy Marie Amoratan, 24 nga taga Sityo Cruzan sa Barangay Candulawan nga nasakmitan og mga pinakete sa shabu.
Samtang si Dexter Cabalda, 38, nga taga Sityo Kilawan sa Barangay Tangke sa dakbayan sa Talisay nga usa ka High Value Individual, nasakmitan og shabu nga nitimbang og 30.54 gramos.
Samtang laing HVI ang nasikop sa Dominggo sa kaadlawon, Septiyembre 13, sila Marianita Villarmea, Ryan Avillanida ug Christusio Legaspina, pulos hingkod ang edad ug nasakmitan og drugas nga motimbang og 8.68 gramos sa shabu.
Sa kinatibuk-an, niabot sa 56.98 gramos ang timbang sa drugas nga nasakmit gikan sa mga dinakpan nga adunay balor nga P401,416.
Si PMaj. Gerard Ace Pelare niingon nga ang mga dinakpan mao ni ang ilang padayon nga pag-implimentar sa hugot nga kampanya sa ilegal nga drugas.
Atol sa pagbisita sa TCPS ni PCol. Aladdin Collado, bag-ong direktor sa Cebu Police Provincial Office (CPPO), kagahapon, Septiyembre 13, iyang gipasabot ang mga dinakpan nganong sila gipangposasan ug nangadakpan.
Matod ni Collado ngadto kanila nga mamahimong magsilbi sa matag usa sa mga dinakpan ug mamahimong makapamalandong sila nga dili moabot sa punto nga sila maposasan kon wala sila misulod sa ilegal nga kalihukan labi na sa drugas.
Samtang, mag-live-in nasikop uban sa ilang ka kunsabo ug nakuhaag binultong drugas niadtong Biyernes, Septiyembre 11, sa alas 10:05 sa gabii didto sa Sitio Agay-ay, Brgy. Poblacion lungsod sa Liloan.
Si Arnold Ortega, 45, nagpuyo sa nahisgutang lugar ug HVI, nasikop uban sa iyang kapuyo nga si Violita Obsequies, 52.
Lakip sa nasikop ang ilang ka kunsabo nga si Lunithe Dequitos, 18, ug minyo.
Si Police Lt. Col. Randi Korret, hepe sa Provincial Intelligence Unit (PIU) sa CPPO, maoy nangu sa operasyon, uban sa mga sakop sa Provincial Drugs Enforcement Unit.
Si Korret, mibutyag nga si Ortega, usa sa mga bigtime pusher sa nahisgutang dapit.
Ilang gi-buy-bust pinaagi sa pagpalit og usa ka medium size nga putos sa shabu.
Dihang napusasan, nakuhaan pag laing tulo ka medium nga putos sa shabu.
Ang drugas mitimbang sa 20 gramos, mobalor sa P136 mil pesos base sa DDB vue ug halin nga P1,000. (BBT, GPL)