SA PAGLINGKOD sa bag-ong director sa Cebu Police Provincial Office (CPPO) kagahapon, Septiyembre 13, si Police Colonel Aladdin Collado nagkanayon nga ang direktiba niya sa tanang kapulisan sa probinsiya mao ang hugot nga pagpatuman sa bag-ong polisiya sa bag-ong liderato.
Dugang ni Collado nga mas angayan siguro nga palapdan pa ang pagpatuman niini hangtud na ngadto sa labing ubos nga ranggo sa han-ay sa Philippine National Police (PNP) mao ang back to basic sa serbisyo sa publiko.
Dugang ni Collado nga nunot na niining krisis sa pandemiya sa Covid-19 diin ang lukop probinsiya sa Sugbo gipailawom sa modified general community quarantine (MGCQ), sila mopatuman gyud subay sa nauyonan sa Inter-Agency Task Force (IATF).
"We are covered by governing agency yon po ay sinusundan natin we have the IATF and its regional IATF. So, kung ano po ang kanilang napag-usapan, then we should follow their guidelines,” dugang ni Collado.
Matod niya, wala kini naghandom sa kon unsa man ang mapaabot sa iyang mga sakop lukop probinsiya gawas lang sa pabilin nga pagmatngon ug maigmaton sa pagpatuman sa pagsumpo kanunay sa kriminalidad.
Ingon man ang padayon sa pagpatuman sa kampanya kontra ilegal nga kalihukan apil na ang pag-implimentar sa kanunay sa health protocol labi na nga ang probinsiya anaa pa sa pakigbugno sa krisis sa pandemiya.
Dugang ni Collado nga siguro angayan usab nga sundon sa iyang mga sakop ang iyang mga adbokasiya nga usa sa sumbanan sa usa ka pulis sa ilang sensiro nga pagpangutungdanan.
“Actually eto yong sinusunod ko sa sarili ko eh, it’s a basic. Sa aking pagkatao, bilang isang pulis at hindi naman eto bago sa lahat. Yung Adherence to policy and procedures back to basic commitment to police service, discipline, efficient and effective policing,” pagpasabot ni Collado sa Superbalita Cebu. (BBT)