SI Roger Pogoy ang usa sa mga bag-ong henerasyon sa mga Sugbuanong basketball player nga mikulit og pangalan sa Philippine Basketball Association (PBA) sa sa kaulohan.
Ang guard sa TnT KaTropa, kinsa lumad nga taga Talisay City, Cebu, nakaduwa sab sa Gilas Pilipinas sa 2019 FIBA Basketball World Cup.
Anaa pud siya sa lineup sa national team sa 30th Southeast Asian (SEA) Games apan wala makaduwa tungod sa injury.
Usa lang si Pogoy sa sikat nga mga pro basketball player nga nagagikan sa Queen City of the South lakip na ang six-time PBA Most Valuable Player (MVP) nga si June Mar Fajardo sa San Miguel Beermen.
Sa dihang gipangutana kon unsa ang naa sa Sugbo nganong daghang dekalidad nga mga basketbolista ang naggikan sa dinhi, gibutyag ni Pogoy nga tungod kini sa mentalidad sa mga Sugboanon.
“Palaban ang taga Cebu, pag hindi nakaka-shoot hahanap ng paraan iyan dun sa rebound o di kaya sa depensa,” pasabot ni Pogoy sa unang episode sa MVPSF Youth League-Cebu show.
Sa wala pa niya makab-ot iyang pangandoy, ang kanhi magduduwa sa University of Cebu ug Far Eastern University nagsugod sa iyang karera sa basketball pinaagi sa gagmay nga torneyo dinhi sa Sugbo.
Gibutyag niya nga gikan pud siya sa probinsiya sama sa ubang mga magduduwa ug moduwa lang siya sa kilid-kilid sa una, pustaanay og “ice water” sa 3-on-3 o 1-on-1 nga basketball.
Ang 28 anyos ug 6-foot-2 guard midasig sa mga batan-ong basketbolista nga dili mawagtangan og paglaom kay walay imposible kon maningkamot ug mosalig lang sa Ginoo.
“Huna-hunaa lang gyud nga as long nga kusgan pa ka, naa gyuy pag-asa kay di ta biyaan sa Ginoo, tagaan ta’g future niya,” tambag ni Pogoy.
Si Pogoy usa sa mga sinaligan sa FEU Tamaraws sa ilang paglangkat sa men’s basketball title sa University Athletic Association of the Philippines (UAAP) niadtong 2015.
Sa iyang pagsulod sa PBA, nahimo siyang Rookie of the Year niadtong 2017 ug 3-time PBA All-Star.