ANG Mandaue City Police Office (MCPO) mohimo og virtual meeting sa tanang security providers sa dakbayan.
Kini tungod nagsugod na ang “ber” months diin ang tulis og kawat mas mukusog na sad.
Matod ni PCol. Jonathan Abella, hepe sa MCPO, nga makigkoordinar sila sa mga security provider sa mga establishemento aron pagpangandam sa mga krimen sama sa tulis ug kawat.
Nagplano si Abella nga abuton ang tanang security provider pinaagi sa matag estasyon.
Matod ni Abella nga hatagan niya og direktiba ang kada estasyon nga makig-abot ngadto sa mga security provider sa ilang hurisdiksyon isip pagpangandam sa “ber” months.
Dugang ni Abella nga pagahimoon sab gihapon nila ang ang naandan nga roving operation ug pagtambay og pipila ka mga minuto establishemento apan mas pahugtan pa kini.
Sa ilang pag-roving pangumustahon nila ang mga gwardya kung wala ba kini mga namatikdan nga mga kadudahang personalidad.
Gani hatagan sab nila og mga litrato sa mga personalidad nga posibleng mupasiugda og pagpanulis o kawat sa ilang establishemento.
Bisan paman nga wala pa silay nadawat nga taho sa mga susamang krimen, padayon gihapon ang ilang pagpangandam ug paghugot sa seguridad sa syudad.
Karon nga wala pa sab nabalik ang mga pampublikong transportasyon sama sa jeep, wala pa sab silay nataho nga pagpanulis sulod sa mga transportasyon. (KFD)