NANGHINAOT Lapu-Lapu City Mayor Junard Chan nga tagaan ug paborableng tubag ang iyang hangyo sa Maritime Inducstry Authority (Marina) 7 nga dili lang una wagtangon ang mga kahoy nga motorbanca sa dakbayan.
Gihimo kini sa mayor human nga nakadawat og memorandum gikan sa naasoyng buhatan niadtong Septiyembre 12.
Alang kang Chan, dili pa karon ang insaktong panahon nga ipatuman unta kini sanglit anaa pa kita sa pandemiya sa coronavirus disease 2019 (Covid-19).
Nasayod ang mayor nga wala gayuy kwarta ang operators ug boatmen niining mga tungora para mopalit og fiber glass nga mga motorbanca nga maoy hulip sa naandang kahoy.
Dugang sa mayor nga gikalipay na unta niya ang posibleng pagbalik sa panginabuhian sa mga nagsalig sa turismo sa dakbayan sama sa motorbanca operators ug boatmen nga mao ang moatiman sa mga turistang ganahan mopahimus sa island hopping packages sa dakbayan.
Subo nga daghang mawagtangan og panginabuhi kon idayon ang plano sa Marina 7 sa pag-phase-out sa mga kahoy nga motorbanca diin dakong tabang turismo sa dakbayan. (GCM)