DAVAO DEL NORTE -- Personal nga bikil ang gituohang motibo sa kamatayon sa handler og manok panabong nga gipusil sa wala mailhing armado sa Purok 13-A, Barangay San Miguel, siyudad sa Tagum alas 9:00 sa buntag, Lunes, Septyembre 14.
Ang biktima giila nga mao si Donnel Tambis Andoy, 41, sakop sa LYR CBonding Committee ug molupyo sa Purok 13-A, Barangay San Miguel.
Subay sa report, nasayran nga ang biktima nagtindog atubangan sa Dodong Vulcanizing Shop samtang nagpaabot sa gipaayo niya nga ligid sa motor, apan kalit nga niabot ang wala mailhing armadong tawo ug walay daghang istorya, gipusil ang biktima sa makadaghang higayon tumong sa ulo nga miresulta sa iyang kamatayon.
Human sa gihimong pagpamusil, ang armadong tawo nagdaling mikagiw paingon sa direksiyon sa Purok 4 sa maong barangay.
Narekober gikan sa crime scene ang tulo ka basiyo ug usa ka balines sa gituohang kalibre .45 nga pistola.
Ang patay'ng lawas sa biktima gipahiluna sa Rubio Funeral Services sa Rabi Compound, Barangay Visayan Village sa maong siyudad. (Dexter T. Visitacion)