KIDAPAWAN CITY -- Nakabsan sa kinabuhi ang usa ka dalagita nga gipaak og bitin (banakon) alas 2:50 sa hapon niadtong Lunes.
Giila ang biktima nga si Angelina Francisco, 18, nagpuyo sa Barangay Noa, Magpet, North Cotabato.
Sumala kang Joel Francisco, nga amahan sa biktima, nga gisugo lamang niya ang anak sa pagkuha sa kanding nga gitugway unahan sa ilang balay gumikan kay hapit nang moulan.
Sa diha nga gikuha ni Angelina ang ilang binuhing kanding nga gihikot sa punoan sa kape, kalit lamang siya nga gipaak sa tuo nga paa sa King Cobra o banakon.
Miuli ang dalaga nga nagdagan nga misinggit og pakitabang sa iyang ginikanan.
Gipatambalanan sa albularyo ang dalaga ug wala sab dayon madala sa balay tambalanan gumikan didto sila nagpuyo sa bukid.
Duha lamang ka oras ang milabay, namatay ang dalaga gumikan sa pagkatag sa lala sa bitin sa iyang lawas.
Kahinumdoman nga daghan na ang namatay nga mga molupyo sa probinsiya ilabi na kadtong nagpuyo sa tiilan sa Mount Apo human mapaakan og banakon. (Edgar E. Fuerzas)