2 purok sa Digos City gi-lockdown

Hulagway iya sa Philippine Information Agency
Hulagway iya sa Philippine Information Agency

DIGOS CITY -- Nagpagawas og abiso ang lokal nga gobyerno nga ipailawom sa strict lockdown ang duha ka mga purok sa Barangay Cogon, ning dakbayan, sugod alas 6 sa gabii niadtong Lunes, Septyembre 14.

Subay sa memorandum circular number 2 series of 2020 nga gilagdaan ni Mayor Josef Cagas, gipailawom sa lockdown ang mga purok sa Laminosa ug Kalingkatan aron mapugngan ang pagkuyanap sa Covid-19.

Gilayong mihimo og contact tracing ang mga personahe sa City Health Office (CHO), uban sa paghangyo sa publiko nga mohatag sa ilang kooperasyon.

Nalakip sa maong mando ang pag-awhag sa katawhan nga magpuyo sulod sa ilang balay gawas kung adunay emerhensiya ug wala sab mga sakyanan nga makagawas ug sulod sa maong lugar.

Bisan mga establisemento sa lugar, gimandong sirad-an gawas lamang sa mga botika, sari-sari stores ug mga food outlets, nga nisubay sa istriktong protocol.

Ang mga molupyo sa duha ka purok ipailawom sa temperature check ug ubang health protocols ug kon ugaling adunay makitang sintomas sa Covid-19, ipailawom gilayon sa superbisyon sa CHO.

Gidason sa mayor nga kinahanglan ang contact tracing sa maong dapit human adunay usa ka indibiduwal nga nag-positibo ug nagkadaghan ang nakasinati og hilanat sa lugar. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph