PAMPANGA

Garcia: Pamun king Malambat nang Kakaluguran (Farewell to a Long-time Friend)

Kapisik

"Nung makasakab ka at maligalig, at kaylangan mu ing mapilang lugud at lingap, at ala, alang malilyaring makatud. Ipyak mo ring mata mu at isipan mu ku, at datang kung tambing ken, bang pasalan agyang ing pekamadalumdum mung bengi. Igulisak m'ya ing lagyu ku at balu mu nukarin ku man datang kung mamumandit bang akit da kang pasibayu. Dimla, sibul, kaleldo o taglugus ing gawan mu kabud maus at datang ku ken -- atin kang kakaluguran. Nung ing banwa king babo mu dalumdum at kisnang biga at ing lumang amyam magmula nang labul. Tipunan me ing buntuk mu at awsan meng asikan ing lagyu ku, tambing dandaman mu kung kakatu. Ngeni, e wari mayap abalung atin kang kakaluguran neng deng tau asno karimla? Panasakitan da ka, wa, at lakwan da ka, at kunan de ing kaladwa mu nung paburen mu la, Ay, e ka mabibisa..." -- Carole King, "Atin kang Kakaluguran"

"Paynawa kang payapa, mayumung kaladwa, Balu mung ala na, ala nang malyaring puntalan pa. E ka migaganaka, ing Ginu mu ya ing bala, Paynawa kang payapa, mayumung kaladwa. Balu kung marayu, marayu ing dalan. Tandanan mu kabud, diwa kang kaladwa. Ding makayatung kaplas, daratang la't mamako. Kukupas ya mu iti, lalabas ya mung palage. Paynawa kang payapa, mayumung kaladwa, Ing Ginu ipanglwalu na ka. Ya ngan ing manibala king sabla. Paynawa kang payapa, kayabe king pamalak Na ngan yan. E ka tatakut, ati ka karing gamat Na." -- Siddha, Metung a dalit a meyangu king "Sikanan a Binang Banayad"

***

Dakal la at miyayaliwa la reng taung akakatagmu tamu at deti miyayaliwa la mu naman ugali. Agpang keng ugali da atin tamung abuburi at e abuburi karela at ita ing maging sangkan nung akakaluguran ta la o kabud mu akilala.

Ating panugaling bage keng sarili tamung panugali at ating marayu pangayaliwa king kekatamu dapot akakayabe ta la anting kakaluguran magmula king kekatamung kayanakan angga na king tumwa tamu. Mekad atin kareng kakaluguran ing matalik tamu pamiyabe at ating agyang akakayabe ta'la kabud ta'la akakayabe nu man anti karalas ta'la akakayabe.

Deng aliwa kabud ta'la mu abe dapot ating aliwa a akakaluguran ta'lang matalik at deng kakalugurang matalik ilang panaligan tamu, panwalan at pagkatiwalan tamu karing sablang bage king kekatamung pangatau at mabilug a bye.

Ing panaun malyari na katamung apikawani at antita mu naman ing pamikandayu at ing pamikandayu, pamikawaning malambat panibatan na ning pamagbayu-pamagbayu panakit, pamisip, kapanaligan o kapanwalan. Deti ring agyang mitagmu kayung pasibayu ding kekang kakaluguran ilang panibatan ning pamikawani agya mang miyabe-abe kayung pasibayu.

Ding pikakasundwan yu sadya diritak lang bagya-bagya at ding e yu apikakasundwan sadya darakal la at ditak-ditak mikaka-pilatan na kayu ding kakaluguran mu. Ing sampulung da reti yang maging maging balangkas ning pamiyabe yu o mitatag king pamikawani yu king payntungulan.

Ing pamiyabe yu magi namung pamibalikid karing aldo o banwang pisulu yu anting mikakaluguran dapot nu la man karakal ding pisusulwan yung deti magi na lang paulit-ulit namu at atin kekayu ing sumawa na o makaulatang makasawa na ing balik-balik a salese karing mengalabasan yu -- angga na datang ing malungkut a penandit a akagisingan yu namu a ding milabas yu pala paninap na la mu at ing kasalungsungan e yu ne pisusulu uling atin na kayung sari-sariling dulang a tatalpakan, awang a tatandawan at pasbul a luluba't lulwalan.

Makanyan man, mayumu pa mu rin balikdan pasibayu ing milabas yu ring kekang sadyang kakaluguran lakwas na nung atin nang memun kekayu.

Pamun king kanakung kakaluguran manibat inyang kekaming bayung-sibul a pangabinatilyu pamu: Rolando "Rolly" Tubig, mibansagan "Porang" (Marsu 1, 1954 -- Setyembri 13, 2020) metung karing menatagan king Aguman Kapisik ding kayanakan ning Balen Makabebe.

***

Dake Talabaldugan:

1. lulan (palagyu) dala/darala, bibekut, kikilikan, pupusanan. English -- load, cargo, freight, carried. Alimbawa king pamangamit: "Labis-labis ya lulan a balas at buga ing saken a menakbag keng gilid bunduk inya bala-balaus ya keng lalam ilug."

2. lulód (palagyu) lulud, mabutul a dake ning bitis libutad ning intud at babo bitis. English -- shin, shin bone Alimbawa king pamangamit: "Tinud ya ing lulud na keng lakbangan inya mipasubsub ya ing bingut keng gabun at mayap namu malambut ing digpan na uling madikut."

3. lulón (palagyu) lulun, balikungkung, balikudkud. English -- roll as in mat, paper, money, blanket, cloth, etc.. Alimbawa king pamangamit: "Likas ing lulun ning bulung kwayan kabud mapigtal ya keng impun at asne kayayat at e mu ne mlyaring isubli keng sadya uling mengasyas ne ."

***

Sadyang gawi da reng Kapampangan

Ing sabi da reng apu mi kanitang minuna, ung manuldul at mangildap dapat panakpan la ngan deng salamin ati king kilub ning pibale-bale. Kasi kanu bala managkat lang kildap deng salamin uling kakablas da ing nanu mang mitutulid karela. Ita parati dang paganaka kabud dintang na ing kauran at manuldul na at mangildap.

Metung na namang mekalingwan a gawi da reng kabalen tamu ita agyang sabyan ta'nang iriya mu. Mekad tutu uling atin lang asupri deng salamin keng gulut da a magpakablas kareng nanu mang ati king arap da. Inya mapalyaring tutu ing gawing papatakap da lang tela o ulas ding salami kanita deng makatwang Kapampangan.

***

PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan -- ding keyang dalit, kawatasan, amlat at miyayaliwang kapaglalangan.

PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph