MAKABATON na unya og emergency exit ang Barangay Hipodromo, Siyudad sa Sugbo, paingon sa Ayala Access Road, labing dugay karong Oktubre 30, 2020.
Si Mayor Edgardo Labella nitahas kang Konsehal Jerry Guardo, chairman sa technical infrastructure committee, pag-abli sa dalan paingon sa Ayala aron adunay maagian ang libuan ka mga residente panahon sa emerhensiya sama sa sunog.
Ang Barangay Hipodromo, aduna lay usa ka entrance ug mao say gihimo nga exit sa mga tawo.
Ang problema dugay na nga nasinati sa katawhan ug delikado kon pananglit adunay motumaw nga emergency.
Sa Huwebes, Septiyembre 17, mopahigayon og final ocular inspection ang grupo ni Guardo ug Arce, hepe sa Prevention, Restoration, Order, Beautification, and Enhancement (PROBE) ug barangay council pinangulohan ni Kapitan Ruperto Bacolod para mahawan ang lugar ug aduna nay exit ang katawhan sa Hipodromo.
Matod ni Guardo nga ang problema dugay nang nasinati sa maong barangay gikan pa sa administrasyon nilang kanhi mayor Tomas Osmeña ug Michael Rama nga karon maoy bise mayor.
Si Guardo nihulagway nga sa Oktubre 30, matubag na ang dugay nang gipanghinaot sa taga Hipodromo nga makabaton og laing agianan pagawas sa ilang barangay.
Dugang sa konsehal nga dihang naigo og sunog ang Hipodromo, nagtapok ang mga tawo sa sulod ug dili makagawas ang mga sakyanan sanglit dili kagawas kay naa kakababag ang mga truck sa bombero nga maoy nipawong sa kayo. (PAC)