NABILANGGO ang usa ka 28 anyos nga minyo nga human gidakop sa mga pulis sa Labangon Police Station niadtong Lunes, Septiyembre 14, 2020 human gireklamo sa inahan sa usa ka 16 anyos nga dalaga sa pagpanghinol niini.
Si Police Corporal Mary Marjorie Rama sa Womens and Children Protection Desk sa Labangon Police, niila sa suspek nga si JM, 28, lumolupyo ra usab sa usa ka barangay ubos sa juridiction sa Labangon Police.
Samtang ang biktima nga si Monique (tinuod nga ngan gipungan), silingan ra sa suspek.
Sa imbestigasyon sa WCPD, ang giingong panglugos nahitabo sa panimalay ni JM kay giingong niadto ang dalaga.
Si Rama wala na kaayo mohatag og detalye sa hitabo, apan giingong nakuha ang pagkababaye sa biktima.
Ila pang gihuwat ang resulta sa medical exam sa dalaga una pa ipasaka ang kaso.
Ang asawa ni JM, kinsa nihatag sa habig sa iyang bana, apan gipugngan ning mantalaan ang ngan, nihimakak nga lugos ang nahitabo tungod kay matod niya, ang dalaga ug iyang bana manag-uyab.
“Ang babaye man, Sir, ang moadto daw sa amo, ingon sa akong bana. Gani, mosuyop man pud daw maong moadto na siya,” pasangil sa asawa.
Apan si Rama mibutyag nga depensa kini sa asawa, apan kay menor man ang dalaga, maigo gihapon sa kaso si JM. (BBT)