GIPAHIBAWO ni Lapu-Lapu City Mayor Junard Chan nga wa na usa sa mgamedical frontliners ug kawani sa City Disaster Risk Reduction and Management Office (CDRRMO) nga nagpositibo sa coronavirus disease (Covid-19).
Ang mga medical frontliner mga sakop sa City Health Office ug Lapu-Lapu City District Hospital sa Brgy. Gun-ob nga moay sagad moatiman sa mga pasyente sa dakbayan.
Nasuta kini ni Chan human gipaubos sila sa laing hugna sa swab testing aron pagsiguro nga Covid-free ang mga personnel nga moalagad sa mga Oponganon.
Gumikan niini, masaligon si Chan nga makab-ot na sa hingpit ang pagka Covid-free unya sa dakbayan sa di madugay ug mabalik na sa normal ang naandang kinabuhi sa mga Oponganon.
Padayon siyang nipahimangno sa tanang Oponganon sa padayong pagsunod sa health protocol sa ingon di na mobalik pa ang pagsaka sa kaso sa dakbayan.
Niadtong Septiyembre 11, gisugdan sa pag swab test ang mga motorbanca operator ug boatmen sa isla sa Olango aron masegurong way gi-Covid kanila nunot sa plano sa dakbayan nga pagbukas na sa turismo.
Ang mga mag positibo di lang una padawaton og mga turista ug ipaubos sa isolation sa pasilidad sa dakbayan o sa Sta Rosa District Hospital.
Sa Septiyembre 16 hangtod sa 23 ipaubos usab sa swab test ang mga boatmen, motorbanca operators ug dive shop owners sa ubang barangay sa Lapu-Lapu aron pagsiguro sa kaluwasan sa tanan.
“Tabangi ako sa pag-ampo sa atong milagrosong Birhen sa Regla ug sa Balaang Bata Sr. Sto Niño nga ma Covid-free na gyud kita,” matod ni Chan. (GCM)