Gibasura sa korte ang kaso ni Bambi

NAHULOG nga way bili ang duha ka kasong kriminal nga gisang-at sa Philippine National Police (PNP) batok ni Maria Victoria “Bambi’ Beltran human nga gibasura kini sa Municipal Trial Court in Cities (MTCC) gumikan sa kakuwang sa ebidensiya.

Si Presiding Judge Yvonne Artiaga sa Branch 03 ni-abswelto ni Beltran sa mga kaso ubos sa Section 9(b) sa Republic Act 11332 kon Law on Reporting of Communicable Disease ug Section 6(f) sa RA 11469 kon Bayanihan to Heal as One Act.

“The court pursuant to Sections 12 and 13 of the 1991 Revised Rule on Summary Procedure, hereby orders the dismissal of these cases, there being no cause nor ground to hold Maria Victoria Burdeos Beltran for trial,” tipik sa 5 ka pahina nga desisyon ni Artiaga niadtong Martes, Septiyembre 15,2020.

Ang arraignment nga gikatakda sa Septiyembre 21 ang gikanselar na usab sa huwes.

Si Mayor Edgar Labella sa iyang bahin nagkanayon nga iyang gitahod ang desisyon sa korte ug dili na mosang-at og motion for reconsideration ang City Legal Office nga maoy nagtabang sa PNP aron nga mapadangat ang maong reklamo.

Kahinumdoman nga niadtong Abril 18, si Beltran ni post sa iyang Facebook account ug nagkanayon: “9,000+new cases (All from Zapatera) of Covid-19 in Cebu City in one day. We are now the epicenter of the whole solar system.”

Apan korte niingon nga ang post ni Beltran dili makonsiderar nga false information ilawom sa Section 6(f) ug misinformation sa Section 9(b) sanglit nigawas sa daily newspapers sa Cebu, base sa pamahayag sa City Health Officer nga gikonsiderar nila nga infected na ang tanang tawo sa Sityo Zapatera, Barangay Luz nga unang giingong adunay 9,000 nga populasyon.

Ang korte niingon nga dili false information ug misinformation ang post ni Beltran sanglit ang data nga naa sa iyang post gikan sa official pronouncement sa kagamhanan. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph