SUD lang sa 15 minutos nakatagamtam sa iyang pagkagawasnon si Julivyn Terante, usa sa suspek sa pagtulis sa JCenter Mall niadtong 2019, human siya nakapiyansa niadtong Septiyembre 14, 2020 hinungdan nga nakagawas sa Mandaue City Jail.
Apan nahagba-patay si Terante, 43, samtang nagbaktas uban sa iyang kapuyo aron unta mamauli human gipusil sa gunmen luwan sa usa ka Toyota Innova, kolor gray.
Si Terante nagpuyo sa Wireless, dakbayan sa Mandaue apan lumad nga taga-Barangay Lumban, Tangub City, Misamis Occidental.
“Duha ang nakit-an sa atong witness pero wala ma-identify kay tabon man daw sa nawong. Tungod siguro sa pagkalisang wala na mahibalo sa unsay sunod nga nahitabo, buto buto nalang ang iyang nadunggan daw,” pamahayag ni Police Major Aldrin Villacampa, hepe sa Police Station 5.
Sa maong adlaw nakapiyansa og P100,000 si Terante sa kasong “robbery in band” apan naka-apply kini og surety bond nga P21,000 nga gitampu-tampohan sa iyang mga igsuon.
“Naglakaw ra mi, Sir, kay wala man taxi mosulod didto kay tuyounon man gud, mao nga nagdungan mi og baktas,” saysay ni Ailyn Gilbero, kapuyo sa gipatay.
Apan namatikdan na ni Gilbero kinsa miabot sa city jail nianang sayong hapon diha nang daan ang Innova nga sakyanan nag-parking sa gawas nga way plate number.
Samtang nagtuo ang hepe sa Mandaue City Police Office, PCol. Jonathan Abella nga posible nga pagpanimawos sa iyang mga kaubanng tulisan tungod kay ang biktima mipiyait kon kinsay iyang mga kauban nga nanulis sa JCenter mall.
Giangkon ni Abella nga wala pa silay matumbok nga responsable tungod kay walay naka-identify sa mga mamumuno gawas pa walay nakamontar nga CCTV camera sa dapit ug ngit-ngit usab ang lugar sa nahitaboan.
Si Terante nasikop sa gihimong follow-up operation sa kapulisan sa Police Regional Office 7 didto sa dakbayan sa Bogo dul-an na sa usa ka tuig ang milabay human sa nahitabong tulis sa jewelry shop sud sa JCenter. (BBT, AYB, KFD)