SA pagsaulog sa tibuok Kristohanong Katilingban sa Pasko sa Pagkabanhaw, maoy gipadangat nga mensahe sa kasamtangang Presidente sa Catholics Bishops Conference of the Philippines Archobishop Nereo Odchimar sa mga Pilipino ang gasa sa paglaom nga gisimbulohan sa kadaugan sa kinabuhi labaw sa kamatayon ih sa pagkabanhaw sa atong Ginoong Hesus.
Nga taliwala sa kalisdanan nga giantos og gitagamtam karun sa kinabag-an sa atong katawhan mugna sa nagkagrabeng kawad-un, panlimbong sa eleksyon, pagkawalay respeto sa kinabuhi, pangurakot sa panggubiyerno ug sa susamang dagway og buhat sa pagpanlupig ug pagpangabuso. Ang kasagaran sa mga Pilipino ang tua na lang molantaw sa pagbiya sa nasud alang sa kaugmaon ug kaluwasan sa ilang pamilya.
Apan bisan pa man gani niini, ang giuluhan og mga bagong bayani nga naghatag og dolyares sa ilang mga pamilya dinhi sa Pilipinas nga mao usay nakasalbar sa atong nagkuyaig nga ekonomiya ang nasugamak sa dili mabangbang nga pagpangabuso ug ang nakaparat kay ang atong gobiyernong dawat limpyo ang wala gyuy nahimo alang sa pag ayuda sa ilang mga kaso.
Tungod ba kaha ning maong kalisdanan, nahimong nakubalan ang konsensya sa atong katawhan? Hinungdan nga hingpit nga nawagtang ang birtud sa nasyunalismo ug kini giilisan sa kagaw sa pangurakot. Kay mao may nasilsil sa kasingkasing ug alimpatakan mapribado man o hilabi na gyud sa pampublikong sector sa katilingban ang iyahay sa pagluwas sa kaugalingun ug ang pag-una sa personal nga katagbawan.
Ning panahon karun sa pamulitika, misibaw usab ang mga milagro sa kwarta nga maoy nakapatuis sa prinsipyo sa mga oportunistang mga pulitiko ug susama kang hudas. Dali kaayong gibaligya ang ilang pagsuporta ug tua na mihalin sa makahatag kanila og dakong kwarta alang sa pagpangampanya.
Apan ang mas angayan nga bantayan sa katawhan kining mga matang sa pulitiko nga bisan og mikangkang na sa salapi bugti sa ilang pagbalimbing, magsige gihapon sa pagpatoo sa ilang pagkalimpyo ug maoy ipunay sa pagpanghambog sa publiko ang palabra de honor. Kay og ni Pope John Paul II pa, mas angayan nga bantayan ug kabalak-an sa katawhan ang palusot kaysa sa bakak, kay ang palusot mao ang matang sa bakak nga binantayan aron sa kahayag sa kamatuuran dili hisakpan.
Samtang sa iyang bahin ang talitapos nga Presidente sa nasod, Gloria Macapagal Arroyo ang midasig usab sa tanang sektor nga kalimtan na ang pamulitika ug maoy gakson ang panaghiusa.
Apan unsa mang matanga sa panaghiusa ang angayang gakson sa atong katawhan ubos sa direksyon ning administrasyon nga naligo sa anomaliya? Gikinahanglang undangon na sa mga Pilipino ang pagpa-ulipon sa gahum sa sapi ug kita makat-on na sa pagbarog sa ensakto ug iwakli ang sayop nga kinaiya sa paghinakog arun sa hingpit kita makalaom sa pagsubang sa bag-ong kaugmaon ning atong nasod.