2 pushers impas sa buy-bust

Hulagway gikan sa Radio Bandera Mindanao Facebook page
Hulagway gikan sa Radio Bandera Mindanao Facebook page

DAVAO DEL NORTE -- Duha ka tawo ang patay samtang tulo ka mga babaye nadakpan sa gilusad nga drug buy-bust operation sa Purok 4-A, Barangay Magdum, Siyudad sa Tagum, alas 12:20 sa udto, Martes, Septiyembre 15, 2020.

Namatay mao sila Bong Salipada Jamara, gikonsiderang top 5 drug personality sa regional level, molupyo sa Purok Ramihan, Datu Abdul Dadia, Siyudad sa Panabo ug Aries Gloria Ondangan nga molupyo sa nahisgutang dapit.

Samtang mga nadakpan mao sila Aprilyn Asta Cawati, Jaina Carangan Maxey ug Juvy Angeles Jamara nga parehong molupyo sa Purok Manaklay, Brgy. Pindasan, Mabini, Davao De Oro.

Subay sa report, ang hiniusang puwersa sa Tagum City Police Station, uban sa lain pang yunit sa kapulisan naglusad og operasyon sa maong dapit nga giingong gideklara nang drug cleared barangay niadtong milabay'ng bulan.

Sumala pa nga nakamatikod ang mga suspek nga ang ilang katransak mga pulis hinungdan nga nahitabo ang pinusilay nga miresulta sa pagkamatay nila Jamara ug Ondagan.

Narekober gikan sa crime scene ang usa ka unit nga .9mm pistol Armscor, uban sa mga bala nga nakuha gikan sa posisyon sa namatay nga si Jamara ug usa ka unit nga .45 colt 1911 sa posisyon ni Ondagan.

Dugang narekober sa crime scene ang 12 ka mga basiyo sa bala sa 5.55mm, M16 rifle, duha ka basiyo sa bala sa .9mm caliber pistol, buy-bust money, duha ka improvised tooter, napulo ka heat-sealed sachet sa shabu, usa ka unit nga KIA Picanto nga kolor yellow nga dunay plaka nga ABS 6542 ug usa ka unit nga Toyota BB kolor brown nga dunay plaka nga MFV 493.

Mitimbang og 18 gramos ang nakuhang shabu gikan sa mga suspek nga gibana-banang dunay market value nga P216,000.

Mga napatay gipahiluna sa pribadong punerarya sa siyudad samtang ang tulo nga nadakpan gikustodiya sa Tagum City Philippine National Police alang sa tukmang disposasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph