Usa ka 16 anyos nga babaye nga dunay deperensiya sa panghunahuna giingong gipulipulihan paglugos sa iyang amahan ug uyoan.
Ang duha ka mga suspek napusasan sa alas 3:00 sa hapon sa Martes, Oktubre 18, 2022, sa lungsod sa Madridejos sa isla sa Bantayan, amihanan sa lalawigan sa Sugbo.
Ang mga suspek mao sila si Dominic (dili tinuod ngalan), 50, mananagat, amahan ug buwag sa asawa ug iyang manghud nga si Cesar (dili tinuod ngan), 42, mananagat, ulitawo, pulos mga lumolupyo sa naasoy nga lungsod.
Wa gibutyag ang tinuod nga pangalan sa mga suspek aron pagtago sa pagkatawo sa biktima.
Ang biktima nga si Eva (dili tinuod ngalan), 16, naa karon ubos sa pag-atiman sa Department of Social Welfare and Development (DSWD) sa Madridejos.
Si Police Senior Master Sgt. Julius Seares sa Madridejos Police Station nga nahinabi sa Superbalita Cebu nagkanayon nga igsuong babaye sa mga suspek maoy nangayo og abag sa mga opisyal sa barangay ug kapulisan.
Sumala ni Seares, si Dominic buwag na sa iyang asawa nga naa sa dakbayan sa Sugbo nagtrabaho. Ang iyang kamaguwangang anak nga 19 anyos nga babaye duna nay pamilya.
Si Eva ug ang iyang manghod nga 14 anyos maoy kauban sa ilang amahan sa balay.
Matud ni Seares, nagtagay ang managsuong suspek sayo sa buntag sa Martes, Oktubre 18, 2022, ug pagka alas 11:00 sa buntag, si Eva giingong gihilabtan sa iyang amahan.
Nilakaw si Dominic apan pagka ala 1:00 sa hapon sa samang adlaw, ang manghud nga si Cesar mao na usab ang giingong nilugos kang Eva.
Si Cesar naabtan sa kapulisan nga hubo sa sapot uban sa biktima sa sulod sa panimalay. Sumala ni Seares, si Cesar niangkon sa krimen nga iyang nabuhat.
“Nagtan-aw ko sa telebisyon unya kalit man si (Eva) naghubo sa akong atubangan. Lain man sab kaayo kon akong balibaran,” kutlo ni Seares sa pulong ni Cesar ngadto sa kapulisan.
Si Dominic, hangtod ning pagsuwat, nihimakak sa pasangil ug gipadayag niini nga nilakaw siya atol sa insidente.
Pero gitudlo siya sa iyang igsuong babaye nga nagpulipuli sila og hilabot sa biktima.
Sumala ni Seares, wala nila isalikway ang posibilidad nga dugay na nga gihimong “sex slave” sa managsuon ang biktima.
Ang biktima gipahiling na sa Pink Room sa Vicente Sotto Memorial Medical Center (VSMMC) ug gipaabot sa kapulisan ang resulta.
Si Seares nibutyag nga giandam na sa ilang Women and Children Protection Desk (WCPD) uban sa DSWD ang tukmang kaso batok sa mga suspek.