SUPERBALITA DAVAO

Delos Reyes: Kasuko kay gipasaylo

Yanong Pagsabot

MAAYONG buntag sa tanan! Atong sugdan ang atong paghisgot karon pinaagi sa Ebanghelyo ni Kristo nga makita sa basahon ni San Lukas 6:27 "Apan ako nagaingon kaninyo nga mga nagapatalinghug: Higugmaon ninyo ang inyong mga kaaway; buhata ninyo ang maayo sa mga nagadumot kaninyo."

Ang Pilipinas giila nga usa ka Kristuhanon nga nasud sa Asya bisan sa kadaghan sa mga tinuohan sa mga pulo sa atong nasud.

Dinhang mibutho ang isyu nga buhion pagbalik ang pagpahamtang sa "death penalty," daghan ang mialma kay dili kuno Diyosnon ang pagpatay o pagpahamtang sa silot nga kamatayon bisan pa sa usa ka kunbiktado sa hukmanan, bisan unsa pa ang iyang sala kay Dios lang ang may katungod pagbawi sa kinabuhi sa tawo kay siya man ang naghatag niini.

Napuno sa pagdayeg si President Rodrigo Duterte sa iyang pagluwas sa mga Pinoy nga gisentenyahan og kamatayon tungod sa mga paglapas sa balaud sa lain nga mga nasud nga iyang gisalbar.

Daw usa ka bayani si Presient Digong alang sa mata sa katawhan kay nagluwas sa hinukman gikan sa ngilit sa kamatayon ug naghimong gawasnon sa mga OFW sa salaud nga ilang gikalambigitan ug nipauli sa atong nasud nga buhi.

Niadtong milabay nga Dominggo, Septiyembre 13, nagkaguliyang ang nasud labi na ang mga kritiko sa administrasyon sa pagkabaniog sa balita nga gihatagan na og Absolute Pardon ni President Duterte si Joseph Scott Pemberton, usa ka Corporal sa US Marines nga gibilanggo sa General Headquarters sa Philippine Army diin iyang pagasilbihan ang napulo ka tuig nga hukom nga pagkabilanggo tungod sa iyang pagtuok ug pagkamatay sa usa ka Pinoy transgender nga si Jennifer Laude niadtong Oktubre 11, 2014 didto sa Olongapo City.

Mga sakop sa lesbian, gay, bisexual, transgender (LGBT) uban sa abogado sa pamilyang Laude nagyawyaw nga gikambyu kuno ni President Digong ang kahalangdon sa pang gobyerno sa atong nasud ngadto sa US tungod sa iyang paghatag sa absolute pardon.

Ang paghatag sa absolute pardon nakalatid sa gahum sa pangulo sa nasud ug walay na lapas, matud ni Executive Secretary Salvador Medialdea. Dili sab insulto o nakapaubos sa sistema sa hustisya sa atong nasud kay ang hukom sa paghatag sa pasaylo gipahigayon sa longapo City Regional Trial Court Branch 17 tungod sa gipakitang maayong gawi ni Pemberton sa bilangguan subay sa Good Conduct of Time Allowance o GCTA Law.

Giaangkon sab sa pamilya ni Laude nga katulo ka higayon silang nidawat og finacial aid nga gihatag ni President Duterte sa kamatayon sa ilang anak.

Si Pemberton, 26 anyos, apil sa US Marines nga nagpahigayon sa Visiting Forces Agreement, nag-training kauban sa Philippine Army niadtong 2014.

Kon mga Pinoy ang hatagan og kagawasan, magsilibrar ta apan kon mga langyaw ang hatagan og kagawasan dinhi sa atong nasud mosilaub dayon ang atong kasuko?

Ang pasaylo nga gihatag kang Pemberton mao ang paghatag kaninya sa higayon nga mag-usab sa iyang kaugalingon apan nagpabilin nga sirado ang mga ganghaan sa atong nasud alang kaniya kay dili na siya tugotan nga motamak pa sa yuta sa mga Pinoy.

Magpadayon sab ang iyang kaso nga iyang atubangon sa Court Martial didto sa ilang nasud diin siya magpaabot sa hukom dugangan ba ang iyang sentensiya o ibalik pa ba siya sa serbisyo isip sakop sa US Marines.

Kon ikaw ang naa sa katundanan ni President Digong, unsa ba kaha ang imong buhaton?

Pagkadako sa usabonon sa atong mga kinaiya aron mahimo tang tinuod ng mga Kristuhanon. Makahimo ba ta sa paghigugma sa atong mga kaaway o mga Kristuhanon lang kita kung pabor sa ato ang mga panghitabo, apan atong ikasakit kung ang panalangin dawaton sa uban?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph