SUPERBALITA CEBU

Nalzaro: Abuso sa kina-iyahan

Saksi

PASTILAN no, hagbay ra diay nagmina og dolomite kanang duha ka dakong mining companies sa Pugalo, Alcoy. Tiaw ba nimo kanang 40 ka tuig naman diay ang ilang operasyon diha. Kon wala mapagya nga ang dolomite gikan diay diha nga maoy gitambak sa lapiyahan sa Manila Bay isip white sand nga maoy nagpaguapo sa maong dapit, dili mohimo og lakang ang atong mga opisyal sa Lalawigan sa Sugbo sa pagpahunong ug pag-imbestigar sa maong operasyon.

Karon pa mohimo og lakang ang Kagamhanan sa Lalawigan pinaagi kang Gov. Gwen Garcia pinaagi sa pag-issue og cease and desist order (CDO) aron ipahunong ang pagpanguha og dolomite sa maong lugar ug dad-on sa kaulohan. Ang maong CDO dili tumong sa pagpahunong gyud sa operasyon sa Philippine Mining Service Corp.n (PMSC) ug sa Dolomite Mining Corp. (DMC), kon dili pagpugong nga mahakot ang maong mga dolomite paingon sa kaulohan.

Nganong walay kalibutan ang atong mga ahensiya sa kagamhanan niini labi pa ang Provincial Environment and Natural Resources (PENRO) nga gi-isyohan diay kini og permit sa Mines and Geosciences Bureau (MGB 7) nga ubos sa Department of Environment and Natural Resources (DENR 7). Iyahay lang sila og panghunaw ug nagtumbok sa DENR central office nga maoy nagmando ug ni-issue og permit niini.

Nganong karon pa man sila manglihok nga kaniadto pa man diay ning maong operasyon diha sa Alcoy? Diin man sila kaniadto ug ang nag-una nilang mga opisyal? Wala pod silay kalibutan? Bisan ang mga opisyal sa Alcoy walay kalibutan nga ni-abuso ang maong mining companies nga naa man kini sa ilang tugkaran. Dili man kini matago sama sa pusporo nga masulod sa bulsa. Ang mga environmentalist o tigpanalipod sa kalikupan diin man pod? Karon lang pod sila mosakay ning maong isyo?

Unta, ang Kagamhanan sa Kalawigan sa Sugbo og mismo ang kagamhanan sa Alcoy adunay bahin sa kita sa operasyon sa maong mga minahan. Anaa kita sa atong Batakang Balaod. Nagtulog-tulog sila sa pansitan. Sus, nangagusbat na ang atong kalikupan, apan wala gyud silay gihimo. (bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph