IPABILIN ni Cebu City Mayor Edgardo Labella ang one-meter social distancing ug di niya ipasunod ang ipatuman nga adjustment sa Department of Transportation (DOTr) sa paglingkod sa mga pasahero sa mga public utility vehicle (PUV) nga namiyahe sa kadalanan sa siyudad.
Ang mayor nagkanayon nga delikado kaayo kon padul-an pa ang distansiya sa mga pasahero gikan sa one meter ngadto sa 0.9 meter ug paglabay sa duha ka semana, himuon nang 0.3 meter.
“With due respect to our leaders from DOTr, here in Cebu City, we will continue the imposition of one meter distance because we can never take the risk kay ang virus is very much around,” padayag ni Labella.
“Dili ta mosunod ana kay delikado pa kaayo ang virus. Unya ato na hinuong ipaduol ang pasahero. So, we should maintain the one-meter distance,” dugang sa mayor.
Si Labella nagkanayon nga iyang manduan ang Cebu City Police Office, Cebu City Transportation Office ug ubang buhatan sa City Hall nga ipatuman gihapon ang usa ka metros nga distansiya sa matag pasahero sulod sa mga PUV ug sa mga lugar nga dagsaanan sa mga pasahero.
Ang mayor moisyu og memorandum ngadto sa mga pulis, CCTO ug ubang mga buhatan nga may labot sa implementasyon sa maong direktiba.
Mao sab kini ang ipatuman ni Labella sa mga bus nga mosulod sa Cebu South Bus Terminal, kansang hurisdiksyon ilawom sa iyang pagdumala isip mayor bisan kon gipanag-iya sa Kapitolyo.
“Instead, we should be more careful kay daghan na ang mga tawo nga nanggawas, ipaduol na hinuon and that’s too close," pagpasabot ni Labella sa iyang baruganan.
Base sa kamanduan sa DOTr, ang 2x2 nga bus makadugang og usa ngadto sa tulo ka mga pasahero samtang ang 3x2 nga bus, gikan sa 25 nga kanhi kapasidad, mahimo nang makapasakay og 36 ka mga pasahero.
Gikutlo usab ni Labella ang pamahayag sa opisyal sa Land Transportation Franchising and Regulatory Board (LTFRB) 7 nga sa pagkakaron, igo pa ang gidaghanon sa mga bus ug modern PUJ nga nagdagan sa siyudad para moatiman sa mga pasahero. (PAC)