SUPERBALITA CEBU

Pagka sakop sa CIDG motibo sa pagpatay ni Junco?

■ SAKYANAN SA KILLERS: Mao kini ang Yamaha Nmax nga gisakyanan sa duha ka killers ni retired Police Inspector Edmund “Bernie” Junco nga wa na makadagan human niya gidasmagan samtang wa pa siya mamatay. Gilauman nga ang mao nga sakyanan mamahimong yawe sa kasulbaran sa kaso. (Amper Campaña)

ANG kanhi pagkasakop sa Criminal Investigation and Detection Group (CIDG) 7 maoy nag-unang anggulo nga susihon sa kapulisan sa kamatayon ni retired Police Inspector Edmund “Bernie” Junco.

Alang kang Cebu City Police Office (CCPO) officer-in-charge Police Colonel Josefino Ligan nga isip kanhi sakop sa CIDG ug naghupot og sensitibong mga kaso, dako ang kahigayunan nga usa kini sa mga motibo sa pagpatay kaniya bisan mga 10 ka tuig na siyang niretiro sa serbisyo.

Si Junco, 65, niretiro sa pagkapulis niadtong 2010.

“Ang atong unang gilantaw gyud kay tungod sa iyang unit assignment before nga naa siya sa Criminal Investigation and Detection Group. And then he was handling controversial cases also, mga significant cases. So, most probably we will be looking deeper in work related as well. Di nato kalimtan nga sa iyang personal sagad sa paghuman sa iyang panirbisyo gikan sa iyang pag retire, tan-awon pud nato na,” matod ni Ligan.

Lain niyang gitan-aw ang negusyo sa magtiayong Junco nga mao ang pagpamaligya ug pagpautang og mga alahas.

Ang negusyo sa magtiayong Junco nilambo og maayo bisan dihang naa pa sa serbisyo si Bernie.

Sa samang higayon, giangkon ni Ligan nga sa ilang nasayran, si Junco wa malakip sa listahan sa drugas ni Presidente Rodrigo Duterte sa dihang aktibo pa kini sa serbisyo sukwahi sa ubang kanhi mga pulis nga gipamatay.

Matod ni Ligan nga limpyo og record si Junco dihang sakop pa siya sa CIDG.

Si Junco namatay sa pag-ambush sa duha ka mga tawo nga ang-angkasay sa motorsiklo sa Martes sa hapon, Septiyembre 15, 2020 sa sityo Nasipit, Barangay Talamban, Dakbayan sa Sugbo.

Dead on arrival siya sa North General Hospital samtang ang iyang asawa nga samdan human natapsingan naa sa luwas nga kahimtang.

Bisan pa niini, way umolon nga task group ang CCPO nga maoy motutuk sa imbestigasyon, inay iyang gitahasan ang Talamban Police Station sa pagkuha sa mga impormasyon nga makatabang sa imbestigasyon.

Abagan sila sa intelligence unit lakip sa investigation branch ug makig alayon usab sila sa CIDG-7 diin kanhi sakop si Junco.

CCTV

Sa kuha sa CCTV camera sa usa ka gasoline station sa dapit, makita nga nihunong sa tunga sa dalan ang puti nga sakyanan ni Junco ug kalit lang nga gibanggaan ang motorsiklo nga adunay duha ka mga sakay sa usa ka gasoline station.

Ang duha mao ang mga gunman. Nakapadagan pa si Junco sa iyang sakyanan samtang ang duha ka mga gunman nanguhag laing motorsiklo aron gamiton sa pagsibat.

Matod ni Police Captain Jonathan Bethooven Taneo, hepe sa Talamban Police Station, si Junco naigo sa liog, walang kilid ug tiyan. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph