DAVAO DEL SUR -- Hingpit nang giaprobahan sa Sangguniang Panlalawigan (SP) ning probinsiya ang Ordinansa Numero 20-53 nga mohatag og nagkadaiyang multa sa paglapas sa mga minimum health protocols nga gitakda sa Inter-Agency Task Force on Covid-19.
Sa unang higayon nga madakpang di mosul-ob og face mask o face shield ug pag-obserba sa social o physical distancing ang usa ka indibiduwal sa mga pampublikong lugar o pampublikong sakyanan, pamultahon kini og P1,000 ug pagtambong sa mandatory health protocol orientation.
Sa ikaduhang higayon nga madakpan, makamulta na og P3,000 ug paghimo og community service ug P5 mil sab ang multa sa ikatulong higayon ug mamahimong mabilanggo subay sa hukom sa korte.
Apil sab nga makamulta ang mga pribado ug komersiyal nga establisemento kung di motuman sa gitakdang protocols sama sa pagbutang og mga disinfecting solution ug washing facilities sa entradang pultahan diin P5,000 sa unang higayon.
P5 mil sab ang multa kon di magsul-ob og face mask o face shield ug social distancing samtang anaa sud sa ilang pasilidad.
Gikinahanglang ipaskin ang kopya sa maong ordinansa sa mga establisemento aron di makamulta og P5,000.
Kon ugaling molapas ang usa ka private commercial establishment sa tanang balaod sa minimum health protocols, gitakda ang multa niini sa P20 mil ug mahimong ikansela sa mayor ang ilang matag luhar nga business permit subay sa rekomendasyon sa mga awtoridad.
Ang maong ordinansa hugot nga ipatuman sa mga sakop sa Philippine National Police, Land Transportation Office, mga opisyal sa barangay, Municipal, City o Provincial Health Office, ug mga opisyal sa probinsiya.
Epektibo gilayon ang maong balaod human giaprobahan sa SP atol sa ika-56 nga regular session niadtong Martes, Septyembre 15, 2020. (Orlando B. Dinoy)