TACURONG CITY -- Gilampurnas og mga dagkong balod ug gibaha ang bukana sa Barangay Poblacion sa Palembang, Sultan Kudarat alas 10:00 sa gabii niadtong Miyerkules, Septyembre 16.
Sa maong hitabo, sila si Hanbad Dalamban Haron, 13, ug ang iyang lola nga si Delima Odin Dalamban, 61, molupyo sa Sitio Kampo Muslim, Barangay Poblacion, nangawala.
Sumala kang Palembang Mayor Teng Kapinan, sayo pa lang sa gabii niadtong adlawa, mibundak na ang makusog nga ulan nga gilakipan og hangin sa ilang dapit, nunot sa dili maayo nga lakat sa panahon nga miigo sa nasud.
Taud-taod lang ang milabay, nagsugod na og hapak ang mga dagkong balod sa bukana sa maong dapit, dungan sab sa pagbaha sa dakong sapa nga nagkonekta sa dagat.
Gibanlas sa baha ug balod ang kabalayan daplin sa dagat sa Palembang.
Gituohan nga gianod ang mag-apohan sa baha, kon diin 25 ka mga balay ang hingpit nga nadaut samtang laing 250 ang gilunopan.
Daling milusad og search and rescue operation ang Municipal Disaster Risk Reduction and Management pangulohan ni Officer Jenel Tuanado ug mga molupyo gihatud sa mga luwas nga dapit.
Nagpaabot na og inisyal nga hinabang ang lokal nga panggamhanan sa Palembang ngadto sa mga pamilya nga apektado sa kalamidad. (Edgar E. Fuerzas)