COTABATO CITY -- Namakwit ang mga molupyo sa tulo ka mga purok sa usa ka barangay human magka-engkuwentro ang duha ka armadong pamilya tungod sa panag-ilog sa utlanan sa yuta alas 10:00 sa buntag niadtong Miyerkules.
Sa maong panag-engkuwentro, upat ang namatay nga sila si Amir Impos, Norodin Magao, Alex Galang ug Robin Magao, samtang laing lima ka mga tawo sab ang naangol, pulos molupyo sa Barangay Kalbugan, Pagalungan, Maguindanao Province.
Gibutyag ni Maguindanao Police Provincial Office Director Colonel Arnold Santiago nga unang gipusil patay si Impos gumikan sa panaglalis sa pamilyang Magao sa tinanum nga kamoteng kahoy ug saging sa rendero (utlanan) sa giugmad nga yuta.
Tungod niini, mibawos dayon ang pamilyang Impos ug gisulong ang pamilyang Magao sa Purok 5, 6, 7 sa nahisgutang barangay, hinungdan nga nahitabo ang duha ka oras nga binakbakay gamit ang mga tag-as nga matang sa armas.
Nagkapandol-pandol og panagan ngadto sa luwas nga lugar ang mga molupyo sa dapit aron nga di maipit sa giyera.
Nahunong lang ang pinusilay sa diha nga nagpatunga ang mga Muslim elders, lokal opisyal sa Pagalungan ug mga lider sa Moro Islamic Liberation Front ug Moro National Liberation Front.
Tungod niini, gitakda nga tapukon ni Pagalungan Mayor Datu Salik Mamasabulod ang nagka-engkuwentro nga mga pamilya alang sa malinawon nga panagsabot.