Kaso sa Covid-19 sa Cagayan de Oro anaa na sa 507

ANAA na sa 507 ang natalang kaso sa coronavirus disease (Covid-19) sa Cagayan de Oro human tulo ka mga locally stranded individuals (LSIs) ug pito ka mga local cases ang nagpositibo sa reverse transcription-polymerase chain reaction (RT-PCR) test.

Sumala ni City Health Officer Dr. Lorraine Nery, sa pito ka mga bag-ong lokal nga kaso, tulo ang mga lokal nga Authorized Persons Outside Residence (Apor kinsa mga close contacts sa mga pasyenteng nagpositibo sa coronavirus.

Ang ika-498 nga kaso usa ka 27 anyos nga lalaki nga LSI nga gikan sa Quiapo, Manila ug residente sa Barangay Puntod. Miabot siya sa Cagayan de Oro pinaagi sa eroplano Setyembre 6 ug gidala dayon siya sa city isolation unit.

Ang lalaki gi-swab Setyembre 10 ug ang resulta migawas nga positibo sa Setyembre 16. Siya asymptomatic ug wala’y comorbidity. Gikatakda nga ibalhin siya sa Temporary Treatment and Monitoring Facility.

Ang ika-499 nga kaso usa ka 9 anyos nga lalaki nga LSI nga gikan sa Malabon ug residente sa Barangay Carmen. Miabot siya sa Cagayan de Oro pinaagi sa eroplano Setyembre 9 ug gidala dayon siya sa city isolation unit.

Ang bata gi-swab sa Setyembre 11 ug positibo ang resulta. Gikatakda nga ibalhin siya sa Temporary Treatment and Monitoring Facility kauban ang iyang amahan.

Ang ika-500 nga kaso usa ka 5 anyos nga lalaki nga LSI gikan sa Tacloban ug residente sa Barangay Carmen. Mibiyahe siya sa Cagayan de Oro nga nagsakay sa usa ka public utility van ug gidala dayon siya sa city isolation unit pag-abot niya sa dakbayan.

Matud ni City Health Office Epidemiologist Dr. Joselito Retuya, ang bata nga lalaki ug ang iyang pamilya nakaadto sa Tacloban kaniadtong Pebrero 2020.

Ang bata gi-swab Setyembre 11 ug ang resulta migawas nga positibo sa Setyembre 16. Siya asymptomatic ug wala’y comorbidity. Nailhan sa City Health Office ang tulo ka mga close contacts.

Ang ika-501 nga kaso usa ka 30 anyos nga babaye nga lokal nga Apor nga nagpuyo sa Barangay Patag. Na-expose siya sa usa ka pasyente nga nagpositibo sa Covid-19 sa Butuan City. Gi-quarantine siya sa Butuan Setyembre 5 ug nibalik siya sa Cagayan de Oro Setyembre 7 pinaagi sa usa ka pribadong van.

Ang babaye naay simtomas Setyembre 12 ug sa Setyembre 13 nakasinati siya og kalisud sa pagginhawa. Nagpakonsulta ug gi-admit siya sa usa ka pampubliko nga ospital sa Camp Evangelista.

Nagpaubus siya sa usa ka rapid diagnostic test ug siya gi-swab pud. Ang resulta migawas nga positibo sa Setyembre 16. Nailhan sa City Health Office ang usa ka close contact, ang bana sa babaye.

Ang ika-502 nga kaso usa ka 59 anyos nga lalaki nga residente sa Barangay Lapasan. Gi-admit siya sa usa ka pribadong ospital ug naa siya'y naka-schedule nga operasyon. Gi-swab siya ug ang resulta migawas nga positibo Setyembre 16.

Ang lalaki gikatakdang ibalhin sa Temporary Treatment and Monitoring Facility. Nailhan sa City Health Office ang duha ka mga household contacts, pulos sila wala’y simtomas.

Ang ika-503 nga kaso usa ka 83 anyos nga babaye nga residente sa Barangay Camaman-an. Gi-admit siya sa usa ka pribadong ospital tungod sa shortness of breathing. Gi-swab siya Setyembre 15 ug ang resulta migawas nga positibo sa Setyembre 16.

Ang babaye karon gi-admit sa Northern Mindanao Medical Center (NMMC). Nailhan sa City Health Office ang upat ka mga close contacts.

Ang ika-504 nga kaso usa ka 39 anyos nga lalaki nga residente sa Barangay Carmen. Boluntaryo siyang gi-swab ingon usa ka kinahanglanon sa trabaho sa ilang kompanya sa Setyembre 14. Ang resulta migawas positibo sa Setyembre 16.

Ang lalaki gikatakdang ibalhin sa Temporary Treatment and Monitoring Facility. Nailhan sa City Health Office ang upat ka mga household contacts, silang tanan gikatakdang ibalhin sa city isolation unit.

Ang ika-505 nga kaso usa ka 36 anyos nga babaye nga lokal nga Apor nga nagpuyo sa Barangay Canitoan. Siya usa ka healthcare worker nga na-expose sa ika-461 ug ika-424 nga mga kaso. Ang iyang katapusang adlaw sa exposure Setyembre 11.

Ang ika-461 nga kaso usa ka 42 anyos nga babaye nga healthcare worker gikan sa usa ka gated community sa Upper Balulang, ug ang ika-424 nga kaso usa ka 66-anyos nga lalaki nga gikan sa usa ka gated community sa Barangay Gusa.

Ang 36 anyos nga babaye adunay hilanat Setyembre 12. Gi-swab siya sa usa ka pribadong ospital Setyembre 14 ug ang resulta migawas nga positibo Setyembre 16.

Kasamtangang naadmit siya sa nahisgutang pribadong tambalanan. Nailhan sa City Health Office ang tulo ka mga household contacts.

Ang ika-506 nga kaso usa ka 46 anyos nga babaye nga lokal nga Apor nga nagpuyo sa Barangay Gusa. Usa siya ka healthcare worker sa NMMC nga na-expose sa ika-361 ug ika-366 nga mga kaso.

Ang ika-361 nga kaso usa ka 30 anyos nga lalaki nga lokal nga Apor, ug ang ika-366 nga kaso usa ka 29 anyos nga babaye nga lokal nga Apor nga taga-Barangay Patag.

Ang katapusang adlaw sa exposure sa 46-anyos nga babaye kaniadtong Setyembre 2. Naa siya'y hilanat, ubo ug sip-on Setyembre 11. Gi-swab siya Setyembre 12 ug positibo ang resulta.

Gi-admit siya sa NMMC ug siya ibalhin sa Temporary Treatment and Monitoring Facility sa syudad. Nailhan sa City Health Office ang duha ka mga household contacts sa babaye.

Ang ika-507 nga kaso usa ka 67-anyos nga lalaki nga residente sa Barangay Carmen. Matud ni Retuya, gidala sa JR Borja General Hospital ang lalaki tungod sa trauma sa ulo. Gi-refer siya sa NMMC diin siya gi-swab Setyembre 12. Ang resulta migawas nga positibo.

Sa pagkakaron, siya naka-admit sa NMMC. Nailhan sa City Health Office ang lima ka household contacats, silang tanan asymptomatic ug gikatakdang ibalhin sa city isolation unit.

Ang Cagayan de Oro adunay 176 ka mga active cases, 17 niini gi-admit sa NMMC, 105 ang mga outpatients ug 54 ang ROFs/LSIs.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph