KINAHANGLANG ang mga lider, labi na sa gobiyerno, maoy mouna pagtuman sa mga lagda ug reglamento nga alang sa ilang mga tawo. Kini ang gitawag og leadership by example.
Ako kining gihisgutan kay makalibug naman gud kining nagkalainlaing protocol nga gipatuman sa Department of Health (DOH) ug Inter-Agency Task Force (IATF) aron kapugngan ang pagkatap sa coronavirus. Sa pagsugod, naglainlain ang idiya kalabot sa pagamit sa facemask. Human niana gihugtan na ang papasul-ob sa maskara ug ang klase sa materiyales nga gamiton alang sa himuong facemask. Nangguwa ang nagkalainlaing desinsyo niini. Adunay facemask nga gibutangan og plastic nga dunay lungag aron hamugaway ang paginhawa sa mogamit nini. Sa dihang mopalit na unta ako sa ingon nining maong mascara, mipahimangno ang DOH nga dili kini ipagamit kay makalusot gihapon ang virus sa lungag niini. Apan anaa man gihapoy mayor nga akong makit-an nga mogamit niining klase sa facemask.
Sa dihang gisugo na usab ang katawhan nga magsul-ob sa face shield, gimbut-an na usab nga kinahanglang motabon kini sa tibuok nawong hangtud sa suwang. Apan nganong anaa may tigpatuman gayud sa health protocol nga kusog kaayong mamadlong sa malapason apan ang iyang face shield sun visor ra man nga ang mata ra ang matabunan. Sa tinuoray mas gusto unta kong musol-ub sa facemask nga dunay gagmay nga lungag aron hamugaway ang paginhawa ingon man sa sun visor apan supak man gud kaha kini sa gimbut-an.
Unsa man supak kining isul-ob sa mga ultimo apan pwede kon dako kag ranggo?
Ang tradisyonal nga public utility jeepney (PUJ) dili pa tugotang makapamasahero sa Cebu City. Sumala ni Mayor Edgardo Labella nga mao kini ang nasabutan atol sa miting nila uban ang Land Transportation Franchizing and Regulatory Board (LTFRB)- 7, Konsehal Joel Garganera ug ubang stakeholder niadtong Martes diin ilang gituki ang local public transport route plan (LPTRP) sa Cebu City. Gitumbok sa mayor ang research sa LTFRB-7 nga nagpakita nga ang daghang mga pasahero sa panahon lang sa peak hours ug diyutay ra ang manakay kon dili tingsakay.
Unsa man ang buhaton sa atong gobiyerno kon modaghan na ang mga sumasakay? Padaganon na ba nila ang mga PUJ ug dili ba kaha pun-an ba nila pagpadagan sa mga bus ug ubang mga public utility vehicle (PUV)?
Nasayud man kita nga dugay nang giduso sa LTFRB ang transport modernization program, apan anaa na may mga PUJ sa Metro Manila ang gipadagan apan gipaayo lang aron mahimong roadworthy. Gisunod usab nila ang mga health protocol sa gobiyerno. Nganong dili man nato sundon ang gihimo sa LTFRB sa National Capital Region (NCR)? Makalulouy na intawon kining mga drayber nga kapin na unom ka buwan nga way kita. Panahon karon sa pagsinabtanay busa ato lang usang ipadaplin kadtong mga proyekto nga buot natong ipatuman niadtong wala pang pandemiya. Unahon nato pagsalbar ang kagutom niining atong kaigsuonan nga nagkutoy ang tiyan. (mannyrabacal1144@gmail.com)